«Nurbanktiń» burynǵy top-menedjerleri J. Temirálıev pen A. Hasenovtyń máıitteri tabyldy

Bul týraly búgin Astanada bolǵan brıfıngte Bas prokýratýranyń resmı ókili Jandos Ómirálıev málim etti.

Onyń aıtýynsha, top-menedjerlerdiń máıitteri 3-3,5 metr tereńdikte temir bóshkelerge jerlengen jáne aqbalshyqpen jasyrylǵan eki shirigen máıit qazyp alyndy. "Máıitterdiń bastaryna qara bas kıimder kıgizilgen, polıetılen pakettermen oralǵan, moıyndary jippen jáne temir symmen baılanǵan. Máıitterdi aldyn ala tekserý nátıjeleri boıynsha olardy Joldas Temirálıev pen Aıbar Hasenovtyń deneleri dep joramal jasaýǵa tolyq negiz bar, - dedi resmı ókil. QR Bas prokýrýtýrasynyń resmı ókili sondaı-aq máıitterde 4 jyldan astam ýaqyt buryn urlanǵan bankırlerdiń kıimderi bolǵanyn málimdedi.

Bas prokýratýranyń dáıekterinshe, máıitterdi Joldas Temirálıev pen Aıbar Hasenovtyń deneleri dep tujyrym jasaýǵa mynadaı negizder bar:

- máıitter tabylǵan oryn buryn tergeý barysynda qylmys qurbandarynyń jerlengen orny bolýy múmkin jer retinde anyqtalǵan bolatyn, biraq izdeý jumystary máıitterdiń tabylǵan jerinen 100-150 metr joǵaryda júrgizilgen;

- 2007 jylǵy aqpannyń 9-nan 10-na qaraǵan túni Temirálıev pen Hasenovti belgisiz baǵytqa alyp ketken ýaqytta qylmyskerlerdiń dál osy máıitti tapqan aýdanda bolǵandary týraly tergeýde jetkilikti derekter bar;

- qylmyskerler bankırlerdi alyp keter aldynda olardyń bastary men betterin qara bas kıimdermen japqan;

- dál osynyń aldynda Hasenovtiń basynan shashyn taqyrlap alyp tastaǵan, al tabylǵan máıitterdiń bireýiniń bas súıeginiń shashy osylaı alynǵan.

- máıitterdiń bireýinde «Blazer» etıketkasy saqtalǵan ish kıimniń qaldyqtary tabyldy, al Hasenovtyń jubaıy buryn onyń kúıeýinde dál osyndaı ish kıim baryn aıtqan bolatyn.

- sonymen qatar, máıitterdiń birinen tabylǵan tis protezi sıpattamalary boıynsha Temirálıevtiń tis protezine sáıkes keledi.

Qazirgi ýaqytta Qazaqstan mamandary Germanııanyń sarapshylaryn tarta otyryp máıitterge saraptamalyq tekserý júrgizýde. Jýyq arada bıologııalyq, fızıko-tehnıkalyq jáne genomdyq saraptamalar júrgiziledi jáne osylardyń nátıjeleri 99,9%-ǵa máıitterdiń kimdiki ekenin anyqtaýǵa múmkindik beredi. Bas Prokýrordyń qaýlysymen Bas prokýratýra, ishki ister jáne ulttyq qaýipsizdik organdarynyń qyzmetkerleriniń quramynan jedel-tergeý toby quryldy jáne olar barlyq qajetti jedel-tergeý jumystaryn júrgizýde.

Budan burynyraqta habarlaǵanymyzdaı, 2007 jylǵy 11 qazan kúni Almaty qalalyq ІІD Qazaqstan Respýblıkasy Іshki ister departamentiniń jedel-tergeý toby Joldas Temirálıev pen Aıbar Qasenovtyń urlanýy faktisi jáne birqatar basqa da aýyr, óte aýyr qylmystar boıynsha qylmystyq isti aıaqtaıtynyn habarlaǵan bolatyn. Atalmysh qylmystyq is boıynsha QR Qylmystyq kodeksiniń 206-babynyń 1- bólimine sáıkes aldyn ala tergeý organdary Qazaqstan Respýblıkasynyń azamattary - Álıev Rahat Muhtarulyna, Koshlıak Vadım Mıhaılovıchqa, Musaev Álnur Áljaparulyna, Sapojnıkov Vıktor Anatolevıchke, Imashev Tólegen Serjanulyna qatysty olardy aıypker retinde tartý jóninde ókim shyǵardy. Atalǵan azamattardyń elden tysqary júrgenine baılanysty QR Qylmystyq kodeksiniń 208-babynyń 3-bólimine sáıkes olarǵa sot Almaty qalasynda 2007 jyly qazannyń 13-inde tańerteńgi saǵat 10-ǵa belgilengeni habarlanǵan bolatyn.

Al 2008 jylǵy qańtarda Almaty qalasynyń Almaly aýdandyq soty Qazaqstannyń Avstrııadaǵy burynǵy elshisi Rahat Álıevti «Nurbank» aktsıonerlik qoǵamynyń top-menedjerlerin urlaǵany úshin kináli dep tanyp, syrttaı 20 jylǵa qatań rejımdegi túrmege kesken bolatyn.

Sot úkimin sýdıa Nurdildá Seıitov 2008 jyldyń 15 qańtarynda jarııa etti. Úkimde R.Álıevtiń, Nurbank klıentteri - birqatar zańdy jáne jeke tulǵalardyń dúnıe-múlik jáne qarjylyq jaǵdaıy týraly senimdi aqparattar negizinde, bank basqarmasy tóraǵasy orynbasarynyń keńesshisi Vadım Koshlıakpen jáne «Almatýr» aktsıonerlik qoǵamynyń dırektory Qurman Ákimqulovpen ymyralasyp, bótenniń múlkine ıe bolý úshin «Nurbanktiń» burynǵy top-menedjerleri Ábilmájin Ǵylymovty, Joldas Temirálıev pen Aıbar Hasenovtardy urlaǵandyǵy aıtylady.

Al 2008 jylǵy 18 qańtarda Astanada ótken brıfıngte Joǵarǵy sottyń Qylmystyq ister jónindegi sot alqasyna qatysýshylar bóliminiń prokýrory Vladımır Kırılenko «Nurbank» aktsıonerlik qoǵamynyń top menedjerleri Joldas Temirálıev pen Aıbar Hasenovtiń máıitterin izdestirý jumystary jalǵasyp jatqanyn málimdegen bolatyn.

V. Kırılenko sol kezde sottyń málimetteri boıynsha atalmysh azamattardy 2007 jyldyń 9 aqpanynan keıin eshkim de kórmegenin aıtqan bolatyn. «Bizdiń paıymdaýymyzsha, olardyń tiri bolýy ekitalaı. Bul másele boıynsha qazir izdestirý sharalary jalǵasýda. Quzyrly organdar máıitterdiń qaı jerde bolýyn shamalap biledi. Oǵan baılanysty izdeýge jatatyn arnaıy aımaq ta belgilenip qoıdy. Onyń kólemi 90 gektarǵa jýyq aımaqty qamtıdy. Onda qazir atqarylýy tıis sharalar óte kóp», - degen bolatyn sol kezde V. Kırılenko.