Nurbaqyt Teńizbaevqa Beıjiń Olımpıadasynyń kúmis medali tapsyryldy
ASTANA. QazAqparat - Sporttyq jekpe-jek jáne kúsh qoldanylatyn sport túrleri konfederatsııasy 2017 jylǵy Álem chempıonattarynda úzdik óner kórsetken boks, kúres, dzıýdo jáne taekvondo sheberlerin, bapkerlerin jáne keshendi ǵylymı top músheleriniń eńbegin eskere kele marapattaý rásimin ótkizdi.
Jalpy sany 11 sportshy men bapker jáne ulttyq qurama komanda mamandarynan quralǵan 36 adam aqshalaı syıaqylarǵa ıe boldy.
Marapattaý rásimin Kúsh qoldanylatyn sport túrleri konfederatsııasynyń tóraǵasy Danııar Abýlǵazın jáne QR Mádenıet jáne sport vıtse-mınıstri Sáken Musaıbekov júrgizdi.
Sonymen qatar saltanatty sharaǵa boks, kúres, dzıýdo jáne taekvondo sport túreleri boıynsha federatsıalardyń basshylary qatysqan bolatyn.
Esterińizge sala keteıik, 2017 jyly Konfederatsııa quramyna kiretin sport túrleri boıynsha sportshylar 11 medal jeńip alǵan bolatyn (1 altyn, 4 kúmis jáne 6 qola). 
Sportshylar, bapkerler men ǵylymı keshendi top mamandaryn úlken jarystarda kórsetken úzdik nátıjeleri úshin syıaqymen marapattaý dástúri - Konfederatsııa qurylǵan sátten qolǵa alynǵan bastama.
2008 jylǵy Beıjiń Olımpıadasy nátıjesin qaıta qaraǵan Halyqaralyq Olımpıada komıteti qazaqstandyq grek-rım sheberi Nurbaqyt Teńizbaevqa kúmis medal berý jóninde sheshim qabyldaǵan. Erejege sáıkes atalǵan medaldi QR UOK Prezıdenti Qulybaev Tımýr Asqarulynyń tapsyrmasyna sáıkes UOK Bas hatshysy D. Abýlǵazın tabystady. Sonymen qatar, 2008 jylǵy Beıjiń Olımpıadasynda aýyr atletıkadan el namysyn qorǵaǵan sportshylarymyz Baqyt Ahmetovke 4-shi oryn alǵanyn rastaıtyn, al Sergeı Istomınge 6-shy oryn alǵanyn rastaıtyn sertıfıkattar tabystaldy.
