Nuraı Serikbaıdyń isi: ІІM qylmysqa qatysty bolýy múmkin adamdardy tekserip jatyr
ASTANA. KAZINFORM — Іshki ister mınıstriniń orynbasary Sanjar Ádilov Shymkentte 21 jastaǵy Nuraı Serikbaıdyń ólimine qatysty isti tergeýdiń mán-jaıyn aıtty.
Onyń sózine qaraǵanda, búginde kisi óltirý deregi boıynsha tergeý amaldary júrip jatyr.
— Bul turǵyda jábirlenýshi taraptyń ýáji bar. Olar Nuraı kúdiktiniń úıine jetkizilgen kezde, onyń qasynda bolǵan adamdardyń qylmystyq quqyq buzý áreketin jasaýǵa qatysy bar-joǵyn tekserý jóninde aıtty. Sonymen qatar, basqa da jaǵdaılardy tekserip jatyrmyz, — dedi S. Ádilov Parlament Májilisinde tilshiler suraǵyna jaýap bere otyryp.
Eske salsaq, marqum Nuraı Serikbaıdyń ólimine kúdikti retinde 28 jastaǵy Shymkent qalasynyń turǵyny ustalyp, ýaqytsha ustaý ızolıatoryna qamaldy.
Prezıdent Shymkenttegi boıjetkenniń ólimine qatysty Bas prokýratýraǵa tapsyrma berdi. Qyzdy óltirý faktisi boıynsha qozǵalǵan qylmystyq isti tergeý úshin ortalyq apparattan mamandar jiberildi.
Boıjetkenniń óliminen keıin óz qyzmetine salǵyrt qarady degen kúdikpen polıtsııa qyzmetkerlerine qylmystyq is qozǵaldy.
