Nuraı Serikbaıdyń otbasy 10 mlrd teńge ótemaqy talap etti
ShYMKENT. KAZINFORM – Nuraı Serikbaıdy óltirý isi boıynsha sot otyrysynda jábirlenýshi tarap 10 mlrd 14 mln 739 myń 65 teńge kóleminde azamattyq talap aryz berdi. Onyń ishinde materıaldyq shyǵyndy óteý jáne moraldyq zııan úshin ótemaqy talaptary qamtylǵan.
Sot otyrysy barysynda jábirlenýshi taraptyń ókilderi materıaldyq jáne moraldyq zııandy óteý týraly azamattyq talap aryzyn jarııalady.
Advokat Aıanhan Omarovtyń aıtýynsha, Qylmystyq-protsestik kodekstiń 106-babyna sáıkes, jábirlenýshi nemese onyń ókili qylmystyq is aıasynda sotqa deıingi tergep-tekserý bastalǵan sátten bastap sot tergeýi aıaqtalǵanǵa deıin azamattyq talap qoıýǵa quqyly. Al qylmys adam ólimine ákelgen jaǵdaıda, mundaı quqyq onyń jaqyn týystaryna beriledi.
Advokattyń sózinshe, Nuraı Serikbaıdyń qaza bolýy otbasy úshin orny tolmas moraldyq qasiretpen qatar, eleýli materıaldyq shyǵyndarǵa da ákelgen.
– Nuraı Serikbaıdyń qaza bolýyna baılanysty otbasy jerleý rásimine, ıslam dástúrlerine sáıkes ótkizilgen dinı rásimderge, qabirine qulpytas ornatýǵa, zań kómegine, sondaı-aq tergeý áreketteri men sot protsesine qatysýǵa baılanysty shyǵyndar kóterdi. Budan bólek is boıynsha kýálardy jetkizýge jumsalǵan shyǵyndar da tólendi. Materıaldyq shyǵynnyń jalpy somasy 14 mln 739 myń 65 teńgeni quraıdy, – dedi advokat.
Jábirlenýshi tarap moraldyq zııandy óteý týraly jeke talap ta qoıdy.
Aıanhan Omarovtyń aıtýynsha, jalǵyz qyzynan aıyrylý ata-anasy úshin, al súıikti qaryndasynan aıyrylý aǵalary úshin aýyr qasiret bolǵan.
– Eshqandaı ótemaqy Nuraıdy qaıtara almaıdy jáne onyń otbasy úshin bul qaıǵynyń ornyn toltyrý múmkin emes. Alaıda Qazaqstan Respýblıkasy Azamattyq kodeksiniń 951 jáne 952-baptarynda moraldyq zııandy aqshalaı túrde óteý qarastyrylǵan. Qylmystyń aýyrlyǵyn, onyń qaıtarymsyz saldaryn, jábirlenýshilerdiń ómir boıǵy jan azabyn jáne ádildik qaǵıdatyn eskere otyryp, moraldyq zııan úshin 10 mlrd teńge óndirip berýdi suraımyz, – dedi Aıanhan Omarov.
Osyǵan baılanysty jábirlenýshi tarap sottan azamattyq talap aryzdy tolyq qanaǵattandyryp, sottalýshy Sherhan Aımahannan materıaldyq jáne moraldyq zııandy qosa alǵanda jalpy 10 mlrd 14 mln 739 myń 65 teńge óndirip berýdi surady.
Azamattyq talap aryz jarııalanǵannan keıin sot dáleldemelerdi zertteýdi jalǵastyrdy. Otyrys barysynda sot-medıtsınalyq sarapshy Janbolat Pernebekov pen qylmystyq isti tergeýdi aıaqtaǵan tergeýshi jaýap berdi.
Jábirlenýshi taraptyń ótinishi boıynsha sot zalyna arnaıy anatomııalyq maneken jetkizildi. Sot-medıtsınalyq sarapshy onyń kómegimen Nuraı Serikbaıǵa salynǵan 35 pyshaq jaraqatynyń ornalasýyn, sıpatyn, baǵytyn jáne keltirý mehanızmin egjeı-tegjeıli kórsetti. Tergeý nusqasy boıynsha, bul jaraqattardy sottalýshy Sherhan Aımahan salǵan.
Kazinform tilshisi sot protsesiniń barysyn baqylaýdy jalǵastyrady.
Eske sala keteıik, buǵan deıin 7 tamyzda sot shabýyl sáti túsirilgen beınejazbany, DNQ saraptamasynyń nátıjelerin, sondaı-aq Nuraıdy alyp ketkennen keıin túsirilgen beınejazbaǵa júrgizilgen sot-psıhologııalyq-lıngvıstıkalyq saraptamanyń qorytyndysyn zerttegen bolatyn.
