Nuraı Serikbaıdyń ólimi: prokýror Sherhan Aımahandy ómir boıyna bas bostandyǵynan aıyrýdy surady

Prokýror sottalýshynyń kinási jábirlenýshi tarap pen kýágerlerdiń jaýaptary, saraptama qorytyndylary jáne qylmystyq is materıaldary arqyly tolyq dáleldengenin málimdedi.

Memlekettik aıyptaý tarapynyń málimetinshe, sottalýshy Nuraıdyń sońynan uzaq ýaqyt boıy ańdyp, qoqan-loqy kórsetken. Sonyń saldarynan qyz telefon nómirlerin birneshe ret aýystyryp, Almatyǵa ketýge májbúr bolǵan.

Prokýror qyzdy kúshtep alyp ketý deregine de toqtaldy. Onyń aıtýynsha, Nuraıdyń Aımahanǵa «óz erkimen kelgenin» aıtqan vıdeosy qysymmen túsirilgen, al qyz aldyn ala daıyndalǵan mátindi aıtýǵa májbúr bolǵan.

Madııar Ábilqasymov istiń «asa qatygezdikpen jasalǵan adam óltirý» retinde saralanýyna qatysty túsinik berdi. Onyń sózinshe, sottalýshynyń áreketin affekt jaǵdaıymen túsindirýge tyrysqan ýájderin psıhıatrııalyq jáne psıhologııalyq saraptama qorytyndylary joqqa shyǵarǵan.

— Nuraı Serikbaı moıny men keýde tusyna salynǵan kóptegen pyshaq jaraqatynan kóz jumdy. Mundaı jaraqattar kóp qan joǵaltýǵa jáne gemorragııalyq shokqa ákelgen. Aımahannyń qylmystyq jaýaptylyǵy men jazasyn jeńildetetin mán-jaılar anyqtalǵan joq. Sottan Sherhan Aımahandy kináli dep tanyp, barlyq qylmys boıynsha taǵaıyndalǵan jazalardy biriktirip, túpkilikti ómir boıyna bas bostandyǵynan aıyrýdy suraımyn, — dedi memlekettik aıyptaýshy Madııar Ábilqasymov.

Prokýror Sherhan Aımahanǵa taǵylǵan ár aıyp boıynsha mynadaı jaza taǵaıyndaýdy surady:

QR QK 99-baby 2-bóliginiń 5-tarmaǵy («Asa qatygezdikpen jasalǵan adam óltirý») boıynsha — ómir boıyna bas bostandyǵynan aıyrý;

QR QK 125-1-babynyń 1-bóligi («Nekege turýǵa májbúrleý») boıynsha — 2 jylǵa bas bostandyǵynan aıyrý;

QR QK 115-1-babynyń 1-bóligi («Stalkıng») boıynsha — 200 saǵat qoǵamdyq jumysqa tartý.

Qylmystyq quqyq buzýshylyqtar jıyntyǵy boıynsha prokýror túpkilikti jazany ómir boıyna bas bostandyǵynan aıyrý túrinde belgilep, ony tótenshe qaýipsiz mekemede óteýdi surady. Sonymen qatar Jábirlenýshilerge ótemaqy qoryna 30 AEK kóleminde májbúrli tólem óndirip, saraptamalarǵa jumsalǵan protsestik shyǵyndardy óteýdi usyndy.

Sot otyrysy jalǵasyp jatyr. Talqylaýda jábirlenýshi taraptyń ókili, Nuraı Serikbaıdyń ákesi jáne sottalýshynyń advokattary sóz sóılep jatyr.

Buǵan deıin sot barysynda sarapshylar Aımahannyń esi durys ekenin rastaǵan. Sondaı-aq sot qorǵaýshy taraptyń ótinishin qanaǵattandyryp, beınejazbadaǵy derektermen sáıkes kelmegen tergeýshi hattamalarynyń birin jaramsyz dep tanyǵan.

Jábirlenýshi tarap 15,7 mln teńge kóleminde azamattyq talap qoıyp, óndirilgen qarajatty qaıyrymdylyq qoryna aýdarýdy kózdep otyrǵanyn málimdegen.

Eske salaıyq, 21 jastaǵy Nuraı Serikbaı 2026 jylǵy 11 qańtarda Shymkentte úıiniń mańynda qaza tapqan. Tergeý nusqasyna sáıkes, buǵan deıin qyzdy «alyp qashý» arqyly nekege turýǵa májbúrleýge árekettengen Sherhan Aımahan oǵan 35 ret pyshaq salǵan.

Sottalýshyǵa úsh bap boıynsha, sonyń ishinde adam óltirý jáne nekege turýǵa májbúrleý derekteri boıynsha aıyp taǵylǵan.

Aıta keteıik, buǵan deıin sot sarapshysy-psıholog Sherhan Aımahanda qylmys jasaǵan sátte fızıologııalyq affekt belgilerin anyqtamaǵanyn jazǵan edik.