Nuraı Serikbaı isi: sottalýshy marqumnyń ózin kinálady
ShYMKENT. KAZINFORM – Shymkent qalasynyń qylmystyq ister jónindegi mamandandyrylǵan aýdanaralyq sotynda 21 jastaǵy Nuraı Serikbaıdyń ólimine qatysty is boıynsha negizgi sot talqylaýy bastaldy.
Alǵash bolyp 28 jastaǵy sottalýshy Sherhan Aımahannan jaýap alyndy. Ol bolǵan oqıǵaǵa qatysty óz nusqasyn baıandady. Buǵan deıingi tyńdaýlarda onyń moınyndaǵy jaraqaty tańǵyshpen jabyq bolǵan. Al búgingi sot otyrysynda moınyndaǵy tańǵysh alynǵan, tek qolyndaǵy jaraqaty tańýly kúıde baıqaldy.
Sottalýshy jaraqattaryn túsindire otyryp, sońǵy kezdesýi kezinde ózine qol jumsaýǵa áreket jasaǵanyn aıtty. Jábirlenýshi taraptyń advokattary bul jaraqattardy týystary men aınalasyndaǵylarǵa baǵyttalǵan demonstratıvti áreket jáne manıpýlıatsııa dep baǵalady.
Eshteńe esimde joq: sottalýshy ne aıtty
Aımahannyń aıtýynsha, ol Nuraımen 2025 jyldyń 14 maýsymynda betashar rásiminde tanysqan. Kúzde qyz oǵan turmysqa shyǵýǵa óz erkimen keliskenin jáne bul týraly qolhat jazǵanyn aıtty. Ol ózine taǵylǵan stalkıng týraly aıypty joqqa shyǵardy. Іs materıaldaryndaǵy júzdegen qońyraýdy tehnıkalyq aqaýmen baılanystyryp, mundaı kólemde qońyraýdy ózi shalmaǵanyn túsindirdi.
Qaıǵyly oqıǵa bolǵan kúni ol Nuraımen qarym-qatynasty toqtatyp, saqınany qaıtarmaq bolǵanyn jetkizdi. Kezdesýge barar aldynda kóliginen eki pyshaqty kezdeısoq kıiminiń qaltasyna salyp alǵanyn jáne ony umytyp ketkenin aıtty.
– Nuraı kelgende men oǵan ekeýmizdiń aıyrylysatynymyzdy jáne bári osy jerden aıaqtalatynyn aıttym. Ol saqınany kóshege laqtyryp jiberdi, keýdemnen uryp, balaǵat sózder aıtty. Sol sátte qaltamdaǵy pyshaqty sezip, ony aldym. Nuraıǵa pyshaqty usynyp: «Pyshaqty al da, maǵan óziń suq» dedim. Ol pyshaqty alyp, oń jaq tusymnan urdy. Odan keıin ne bolǵany esimde joq, affekt jaǵdaıynda boldym, – dedi Sherhan Aımahan sotta.
Sottalýshy pyshaq jaraqatyn salǵan sátin esine túsire almaıtynyn aıtty. Ol muny 2019 jyly basseınde alǵan bas jaraqatynan keıingi psıhıkalyq buzylystyń saldary dep túsindirdi.
Jábirlenýshi taraptyń qorǵaýshylary qoıǵan suraqtar kezinde sottalýshy kisi óltirý men oqıǵa ornynan ketýiniń mán-jaılaryn naqty túsindire almady.
Aımahannyń aıtýynsha, qyz ony jaraqattaǵannan keıin birden esinen tanyp qalǵan. Ol esin qala syrtynda jıypty. Onyń sózinshe, ózindegi jaraqattardy jáne qaltasyndaǵy eki pyshaqty baıqaǵan soń jolaı kólik toqtatyp, jaqyn mańdaǵy polıtsııa bólimine barǵan. Sol jerde Nuraıdyń qaıtys bolǵanyn estigen.
Sottalýshy marqumǵa degen sezimi týraly aıta otyryp, ony óltirý nıeti bolmaǵanyn jáne Nuraıdy qatty jaqsy kórgenin jetkizdi. Sondaı-aq ol marqumnyń týystarynan, óz otbasynan jáne qazaqstandyqtardan keshirim surap, bolǵan oqıǵany aýrýynyń saldary men ýaqytynda emdelmegenimen baılanystyrdy.
Jábirlenýshi taraptyń ustanymy
Jábirlenýshi tarap sottalýshynyń bul nusqasymen kelispeıdi. Advokat Aıanhan Omarovtyń málimdeýinshe, Aımahan jaýapkershilikten jaltarýǵa tyrysyp otyr, al onyń kezdeısoq kezdesý týraly nusqasy shyndyqqa janaspaıdy.
– Nuraı Serikbaıdyń aǵasynyń aıtýynsha, dál 11 qańtar kúni keshki saǵat alty shamasynda Nuraı úıinde alma bálishin daıyndap jatqan. Qamyrǵa qajetti arnaıy qospa alý úshin dúkenge shyqqan. Ol úı kıiminde bolǵan, ústine tek kúrteshe kıgen. Onyń sol kúni sottalýshymen kezdesýge nıeti de, oıy da bolmaǵan. Іs materıaldarynda olardyń hat almasqany týraly eshqandaı derek joq. Ol Nuraıdy saýda ortalyǵynyń janynda ádeıi ańdyp kútken, – dedi advokat.
Aıanhan Omarovtyń aıtýynsha, Respýblıkalyq ortalyqtyń sot-psıhıatrııalyq saraptamasy kúdiktiniń affekt jaǵdaıynda bolǵany týraly nusqany tolyq joqqa shyǵarǵan. Saraptamaǵa sáıkes, qylmys kezinde Aımahan ne istep jatqanyn túsingen ári óz áreketin basqara alǵan. Advokat sonymen qatar tergeý kezinde sottalýshy oqıǵanyń mán-jaıyn egjeı-tegjeıli sıpattaǵanyn aıtyp, qazirgi sottaǵy málimdemelerimen qaıshylyq bar ekenin jetkizdi.
Advokattyń málimetinshe, beınejazbalarda Nuraı tarapynan agressııa baıqalmaıdy, kerisinshe óz ómirin saqtap qalýǵa tyrysqany kórinedi.
Sondaı-aq jábirlenýshi tarap Aımahannyń qarjylyq aýdarymdar týraly málimdemesine túsinikteme berdi.
– Nuraıdyń ata-anasy onyń shotyna túsken qarajattardy tekserdi. Sottalýshy shamamen 185 myń teńge aýdarǵany ras. Alaıda ótken jyldyń qarasha aıynda Nuraıdyń ákesi bul aqshany sottalýshynyń ákesine qaıtarǵan. Ol qaıtadan aqsha jibergen kezde qyzdyń ákesi barlyq somany qaıyrymdylyq qoryna aýdarǵan. Qazirgi ýaqytta Nuraı Serikbaıdyń otbasy sottalýshyǵa bir tıyn da qaryz emes, – dedi Aıanhan Omarov.
Qorǵaýshy Aımahannyń moıny men qolyndaǵy jaraqattaryn ózine qol jumsaý áreketi emes, manıpýlıatsııa dep baǵalady. Sonymen qatar ol stalkıng úshin jazany kúsheıtý týraly petıtsııa daıyndalyp jatqanyn habarlady. Advokat burynǵy jaqyn qarym-qatynasta bolǵan adamdar tarapynan jasalǵan qaıtalama qýdalaý men stalkıngti aýyr qylmystar sanatyna jatqyzýdy usyndy.
Sot otyrysy barysynda marqumnyń ákesi Baýyrjan Serikbaı, anasy Aıgúl jáne aǵalary Dımash pen Sultannan jaýap alý josparlanǵan.
Eske salaıyq, 2026 jylǵy 11 qańtarda Shymkentte 21 jastaǵy stýdent Nuraı Serikbaı kisi qolynan qaza tapqan edi. Tergeý málimetinshe, sottalýshy oǵan 35 ret pyshaq jaraqatyn salǵan. Sherhan Aımahan nekege májbúrleý, stalkıng jáne asa qatygezdikpen adam óltirý baptary boıynsha aıyptalyp otyr. Oǵan ómir boıyna bas bostandyǵynan aıyrýǵa deıingi jaza taǵaıyndalýy múmkin.
