Nuraı Serikbaı isi: sotta zattaı dálelder men beınematerıaldar kórsetildi

Sot protsesinde taraptarǵa úlken ekran arqyly zattaı dálelder, fotokesteler, arhıvtik hat-habarlar jáne tergeý barysynda túsirilgen beınematerıaldar kórsetildi.

Sot aıyptalýshynyń jaýaptaryndaǵy qarama-qaıshylyqtarǵa erekshe nazar aýdardy. Tergeý barysynda Aımahan júrgen baǵyttaryn, jasaǵan áreketterin jáne oqıǵanyń mán-jaıyn egjeı-tegjeıli baıandaǵan bolsa, sotta Nuraıǵa ólimge ákelgen pyshaq jaraqattaryn salǵan sátti esine túsire almaıtynyn birneshe ret aıtty. Tóraǵalyq etýshi sýdıa Samıdın Temiralıev is materıaldaryn zertteý kezinde osy qaıshylyqtarǵa birneshe ret toqtaldy.

Pyshaqtar, kórpeshe jáne kúmán týdyrǵan beınejazba

Aldymen sot qylmys quraly retinde tanylǵan eki pyshaqtyń fotomaterıaldaryn zerttedi. Іs materıaldaryna sáıkes, olardyń biriniń uzyndyǵy 20 santımetrden, ekinshisiniń uzyndyǵy 25 santımetrden asady. Mamandardyń baǵalaýynsha, pyshaqtardyń uzyndyǵy adamnyń ómirlik mańyzdy aǵzalaryna zaqym keltiretin aýyr jaraqattar salýǵa jetkilikti bolǵan.

Sondaı-aq sotta aıyptalýshynyń kıimderi men kórpeshesi de zattaı dálel retinde zertteldi. Tergeý materıaldaryna sáıkes, Aımahan Nuraıdy úıiniń mańynda ańdyǵan kezde kóliginde osy kórpesheni paıdalanyp túnegen, al qylmystan keıin ol quqyq qorǵaý organdarynan jasyryný úshin dalada jatqan.

Budan keıin «alyp qashý» sáti túsirilgen beınejazbalar qaraldy. Bir beınematerıalda Nuraıdyń Sherhan Aımahannyń otbasy turatyn úıge jetkizilgeni kórinedi. Keıin polıtsııa bóliminde túsirilgen taǵy bir beınejazba kórsetildi. Onda Nuraı ózine eshqandaı shaǵymy joq ekenin jáne Sherhanmen qarym-qatynasyn toqtatýǵa nıetti ekenin aıtqan.

Jábirlenýshi taraptyń ókilderi ekinshi beınejazbanyń kúmán týdyratynyn málimdedi.

Olardyń aıtýynsha, polıtsııa qyzmetkeri Nuraıǵa aıtylatyn sózderdi sybyrlap nusqap, qyz sol mátindi qaıtalaǵan.

– Ol jattap alǵan sózderdi jáne kúnderdi «05.10.2025 jyly» dep stsenarıı boıynsha aıtyp tur. Kádimgi ómirde adamdar kúndi bulaı aıtpaıdy. Sońynda tergeýshi umytyp qalǵan jerinde oǵan ózi aıtyp kómektesedi. Aımahannyń úıinde túsirilgen beıneni de qoıylym dep esepteımiz. Nuraı eki táýlik boıy uıyqtamaǵan, tamaq ishpegen, ábden álsirep, qatty sharshaǵan kúıde bolǵan. Eger ol shynymen óz erkimen turmysqa shyǵýǵa kelisken bolsa, úıdegi sporttyq kıimmen kelmes edi jáne ózimen birge jeke bas gıgıenasyna qajetti zattaryn alar edi, – dedi jábirlenýshi taraptyń advokaty Aıanhan Omarov.

Aıyptalýshynyń jaýaby: Eshteńe esimde joq

Sot otyrysynda oqıǵa ornynda jaýaptardy tekserý kezinde túsirilgen beınejazba jáne Aımahannyń polıtsııada advokatynyń qatysýymen bergen jaýaby kórsetildi. Onda aıyptalýshy mekenjaılardy, júrgen baǵyttaryn, kóliktiń markasy men memlekettik nómirin, sondaı-aq telefon nómirlerin naqty aıtyp bergen.

Sot zalynda Aımahan Nuraıdy alyp qashý faktisin jáne onyń iPhone 15 telefonyn tartyp alǵanyn joqqa shyǵarýǵa tyrysty. Ol qyzdyń polıtsııaǵa bergen aryzy shyndyqqa sáıkes kelmeıdi dep málimdedi. Al tergeý kezinde bergen alǵashqy jaýaptaryn ózgertýin polıtsııa qyzmetkerleriniń qysymymen túsindirdi. Aıyptalýshy Nuraıǵa 35 ret pyshaq jaraqatyn salǵan sát týraly jaýap berýden bas tartyp, sol oqıǵa barysy esinde joq ekenin aıtty.

– Ol kezdesýlerdiń, qarym-qatynastyń, jumsaǵan aqshasynyń, júrgen joldarynyń barlyq usaq-túıegin esinde saqtaǵan, biraq dál pyshaq salǵan sátti umyttym deıdi. Biz bul qorǵaný ustanymyn múlde negizsiz ári qısynsyz dep sanaımyz, – dedi jábirlenýshi taraptyń advokaty.

Tórt kúndik ańdý jáne «ózin qorǵadym» degen ýájdiń teriske shyǵarylýy

Sottaǵy eń mańyzdy zerttelgen materıaldardyń biri – 2026 jylǵy 11 qańtarda túsirilgen qalalyq beınebaqylaý kameralarynyń jazbalary boldy. Onda Aımahannyń qylmys bolǵan kúni Nuraı Serikbaıdyń úıiniń mańynda júrgeni jáne onyń qozǵalystary kórinedi.

Beınejazbalar qorǵaýshy taraptyń «kezdeısoq kezdesý» nemese «affekt jaǵdaıynda bolǵan» degen ýájderin joqqa shyǵardy. Kameralar aıyptalýshynyń Nuraıdyń úıiniń mańynda tórt kún boıy ádeıi kezekshilik jasaǵanyn rastady.

– 8, 9, 10 jáne 11 qańtar kúnderi ol bizdiń úıdiń aldynda bolǵan. Muny kórshiler de rastaı alady. Men tergeýshilerden olardan jaýap alýdy suraǵan edim. Biraq stalkıng boıynsha aıyp taǵylǵandyqtan, oǵan qajettilik joq dep jaýap berdi. Nuraıdy ańdý barysynda ol shabýyl josparyn usaq-túıegine deıin oılastyrǵan. Beınetirkegishterdiń qaı jerde turǵanyn, qaı jaqtan jaqyndaǵan yńǵaıly ekenin aldyn ala eseptegen, – dedi marqumnyń ákesi Baýyrjan Saǵynbek.

Aımahan úı mańynda uzaq júrýin basqa bir qyzǵa kelgenimen túsindirýge tyrysty, biraq onyń esimin sotta ataýdan bas tartty. Buǵan deıingi jaýaptarynda mundaı nusqa múlde bolmaǵan. 

– Ol kezdesýge gúl emes, pyshaq alyp kelgen. Bul árekettiń aldyn ala oılastyrylǵanyn jáne qylmystyń qasaqana jasalǵanyn kórsetedi. Affekt jaǵdaıyndaǵy adam mundaı jospar quryp, barlyq málimetterd este saqtaı almaıdy, – dedi advokat.

Sotta aıyptalýshynyń Nuraı birinshi bolyp shabýyl jasady degen málimdemesi de qaraldy. Jábirlenýshi taraptyń advokaty aıyptalýshyny kýálandyrý kezinde jasalǵan sot-medıtsınalyq saraptamanyń (№609/146, 9-tom) qorytyndysyn oqyp berdi. Sarapshylar Aımahannyń qoly men ishindegi jaraqattardy ózi salǵanyn anyqtaǵan.

19 tomnyń úsheýi zertteldi

Qylmystyq is barlyǵy 19 tomnan turady. Sot qylmystyq istiń alǵashqy úsh tomyn zerttedi. Olardyń ishinde Nuraıdyń aryzdary, medıtsınalyq qujattar, zattaı dáleldemelerdiń fotosýretteri, hat-habarlar, tergeý áreketteriniń hattamalary jáne beınematerıaldar bar.

Kelesi sot otyrysy 7 tamyz kúni saǵat 10:00-ge belgilendi. Protsess barysynda qalǵan 16 tom materıal zerttelip, keıin sot jaryssózine kóshý josparlanyp otyr.

Eske salaıyq, 4 tamyzdaǵy sot otyrysynyń birinshi bóliginde Qarataý aýdandyq polıtsııa basqarmasynyń burynǵy tergeýshisi Ábilǵazy Artyqbaı jaýap berdi. Ol 2025 jylǵy qazan aıynda Nuraı Serikbaıdy alyp qashý deregi boıynsha túsken habarlamaǵa baılanysty barǵanyn aıtty. Onyń aıtýynsha, sol kezde Nuraı polıtsııaǵa óz erkimen kelgenin jáne Sherhan Aımahanǵa eshqandaı shaǵymy joq ekenin aıtqan.

Sondaı-aq sotta aıyptalýshynyń ákesi, anasy, baýyrlary men ápkeleri jaýap berdi. Olardyń sózderi Nuraı Serikbaıdyń otbasy músheleriniń narazylyǵyn týdyrdy, óıtkeni olar Aımahannyń týystarynan keshirim de, ókinish te estimegenderin aıtty.

Eske sala keteıik, 21 jastaǵy Nuraı Serikbaı 2026 jylǵy 11 qańtarda qaza tapty.

Sherhan Aımahan buǵan deıin qyzdy «alyp qashý» dástúri arqyly nekege májbúrleýge áreket jasaǵan. Qaıǵyly oqıǵa bolǵan kúni ol Nuraıdy úıiniń mańynda kútip alyp, oǵan 35 ret pyshaq jaraqatyn salǵan.

Osydan keıin kúdikti oqıǵa ornynan qashyp, eki táýlikten keıin ustaldy.

Oǵan adam óltirý jáne nekege májbúrleý sııaqty úsh bap boıynsha aıyp taǵyldy.

Tergeý kezinde Sherhan Aımahan sot-psıhıatrııalyq saraptamadan ótken. Nuraı Serikbaıdy óltirdi degen kúdikti májbúrli psıhıatrııalyq emdeýge jiberildi.

Saraptama qorytyndysy boıynsha ol esi durys dep tanylǵan.