Nuraı Serikbaı isi: Sherhan Aımahan úkim aldynda sońǵy sózin aıtty

Sottalýshy marqumnyń otbasynan keshirim surap, sarapshylardyń qorytyndysymen kelispeıtinin taǵy da málimdedi. Sondaı-aq ol beınejazbada tirkelgen ýaqyt aralyǵynda 35 pyshaq jaraqatyn qysqa ýaqyt ishinde salýdy «fızıkalyq turǵydan múmkin emes» dep sanaıtynyn aıtty.

Aımahan sózin Nuraıdyń ata-anasy men aǵalaryna kóńil aıtýdan bastady. Ol qyzdy jaqsy kórgenin jáne bolǵan jaǵdaıǵa ókinetinin jetkizdi.

– Men Nuraıdy qatty jaqsy kórdim, oǵan degen sezimim shynaıy boldy. Onyń ata-anasyna kóńil aıtamyn jáne shyn júregimmen ókinemin. Nuraıdyń ákesi, anasy jáne eki aǵasynan keshirim suraımyn, – dedi Sherhan Aımahan.

Sottalýshy jábirlenýshi tarap talap etken 15 mln 739 myń 65 teńge kólemindegi materıaldyq shyǵyndy óteýge daıyn ekenin aıtty. Al 10 mlrd teńge kólemindegi moraldyq ótemaqy tóleý talabymen kelispedi.

– Materıaldyq shyǵyndy tolyq moınyma alamyn jáne bolashaqta jumys istep, ony óteýge daıynmyn. Al 10 mlrd teńge kólemindegi moraldyq ótemaqyny moıyndamaımyn. Bolǵan jaǵdaıǵa qatty ókinemin jáne bul ókinish menimen ómir boıy birge bolady, – dedi Aımahan.

Sottalýshy sońǵy sóziniń basym bóligin Nuraımen tragedııaǵa deıingi qarym-qatynasyna arnady. Sherhan Aımahan olardyń arasynda ózara sezim bolǵanyn, únemi kezdesip turǵanyn, otbasyn qurý týraly sóıleskenin jáne qyz Almatyǵa oqýǵa ketkennen keıin de baılanysta bolǵanyn taǵy da aıtty.

Aımahan sondaı-aq 2025 jyldyń qazan aıynda Nuraıdyń Almatydan Shymkentke onymen birge óz erkimen barýǵa keliskenin alǵa tartty. Ol óz nusqasyna dálel retinde jol boıyndaǵy aıaldamalardy, qyzdyń telefonyn paıdalana alǵanyn jáne kómek suraý múmkindigi bolǵanyn keltirdi.

Bul nusqany buǵan deıin jábirlenýshi tarap pen aıyptaý tarapy joqqa shyǵarǵan. Sotta Nuraıdyń málimdemeleri, hat almasýlary, beınejazbalar jáne 2025 jyldyń qazan aıyndaǵy oqıǵalarǵa qatysty basqa da materıaldar zertteldi.

Nuraımen qoshtasý úshin barǵanmyn – sottalýshy

11 qańtardaǵy oqıǵalar týraly aıta kele, Aımahan Nuraımen kezdesýdi sońǵy ret júzdesý retinde josparlaǵanyn málimdedi. Onyń aıtýynsha, ol qyzǵa ózinde qalǵan saqınany qaıtaryp, qarym-qatynasty birjola toqtatqysy kelgen.

– Men Nuraıǵa qoshtasý úshin bardym. Ony óltirý týraly eshqandaı nıetim bolǵan joq, – dedi sottalýshy.

Aımahan pyshaqtyń ózinde qalaı paıda bolǵany týraly óz nusqasyn taǵy qaıtalady. Onyń aıtýynsha, kezdesýge az ýaqyt qalǵanda kólikten pyshaqty taýyp alyp, oǵan mán bermesten qaltasyna salyp qoıǵan.

Ol odan keıingi oqıǵalardyń kóp bóligin esine túsire almaıtynyn aıtty. Sottalýshy janjaldan keıin bolǵan jaıttardyń tek jekelegen sátterin ǵana esinde saqtaǵanyn, keıin basqa jerde esin jıǵanyn jetkizdi.

Ol sondaı-aq tergeý barysynda anyqtalǵan soqqy sanyna kúmán keltirip, shabýyldyń beınejazbada qysqa ýaqytqa sozylǵanyna toqtaldy.

– Beınejazbada jaraqat salý sátiniń ózi, menińshe, shamamen 9-10 sekýndqa sozylady. Al 35 jaraqat salynǵany aıtylyp otyr. Meniń oıymsha, buǵan da nazar aýdarý qajet, – dedi Aımahan.

Buǵan deıin sot-medıtsınalyq saraptama Nuraı Serikbaıdyń denesinde 35 pyshaq jaraqaty bolǵanyn anyqtaǵan. Aldyńǵy sot otyrysynda sarapshy Janbolat Pernebekov olardyń ornalasýyn anatomııalyq maneken arqyly kórsetken.

Sońǵy sózinde Aımahan sot-psıhologııalyq-psıhıatrııalyq saraptamanyń qorytyndysyna da taǵy da qarsylyq bildirdi.

Ol qysqa ýaqyt ishinde 35 ret pyshaq jaraqatyn salýdy «fızıkalyq turǵydan múmkin emes» dep málimdedi. Sonymen qatar ol qylmystan birneshe aı ótken soń júrgizilgen psıhologııalyq-psıhıatrııalyq zertteý oqıǵa kezindegi psıhıkalyq jaǵdaıyn naqty baǵalaýǵa múmkindik bermeıdi dep sanaıtynyn aıtty.

Buǵan deıin sot-psıhıatry sottalýshyda anyqtalǵan psıhıkalyq buzylys onyń óz áreketiniń máni men qoǵamdyq qaýiptiligin túsiný, sondaı-aq ony basqarý qabiletine áser etpegenin aıtqan. Al sot psıhology fızıologııalyq affektini rastaıtyn belgiler anyqtalmaǵanyn málimdegen.

Aımahan bul qorytyndylarmen kelispeıtinin aıtty. Sóziniń sońynda ol taǵy da marqumnyń otbasyna ún qatty.

– Bolǵan jaǵdaıǵa shyn júregimmen ókinemin. Nuraıdyń ákesi, anasy jáne eki aǵasynan keshirim suraımyn. Eń aldymen Nuraıdyń ózinen, ol qazir aramyzda bolmasa da, keshirim suraımyn. Men ony qatty jaqsy kórdim jáne shyn júregimmen ókinemin , – dedi sottalýshy.

Sońǵy sózden keıin sot tóraǵasy Sammıdın Temiralıev is boıynsha úkim beısenbi kúni, ıaǵnı 13 tamyzda jarııalanatynyn málimdedi.

Eske salaıyq, 11 tamyzda Nuraı Serikbaıdyń ólimine qatysty altynshy sot otyrysy aıaqtalǵan bolatyn. Sol kúni sot sot-psıhıatry men psıhologty onlaın rejımde jaýapqa tartty, qorǵaý tarapynyń ótinishterin qarady jáne taraptardyń jaryssózin aıaqtady.

Memlekettik aıyptaýshy Sherhan Aımahandy ómir boıyna bas bostandyǵynan aıyrýdy surady. 

Dál osyndaı jaza taǵaıyndaýdy jábirlenýshi taraptyń ókilderi men Nuraıdyń ákesi de talap etti. Qorǵaý tarapy taǵylǵan aıyptyń bir bóligimen kelispeı, sottalýshy men marqumnyń arasyndaǵy qarym-qatynasqa qatysty óz nusqasyn usyndy.

21 jastaǵy Nuraı Serikbaı 2026 jyldyń 11 qańtarynda qaza tapqan. Buǵan deıin sottalýshy Sherhan Aımahan qyzdy nekege turýǵa májbúrlep, alyp qashqan. Nuraıdyń qarsylyǵynan keıin ony qýdalaýyn jalǵastyrǵan. Tergeý nusqasy boıynsha qaıǵyly oqıǵa bolǵan kúni ol Nuraıǵa 35 ret pyshaq jaraqatyn salǵan.

Odan keıin asa aýyr qylmys jasady degen kúdikke ilingen Aımahan oqıǵa ornynan boı tasalap, eki kúnnen keıin ustaldy.

Aımahanǵa nekege turýǵa májbúrleý, stalkıng jáne asa qatygezdikpen adam óltirý baptary boıynsha aıyp taǵylǵan.

Tergeý barysynda kúdikti sot-psıhıatrııalyq saraptamaǵa jiberilgen. Saraptama ony aqyl-esi durys dep tanyǵan.