Nuraı Serikbaı isi: Sherhan Aımahan ómir boıyna bas bostandyǵynan aıyryldy
ShYMKENT. KAZINFORM – Shymkent qalasynyń qylmystyq ister jónindegi mamandandyrylǵan aýdanaralyq sotynda Nuraı Serikbaıdyń ólimine qatysty qylmystyq is boıynsha úkim shyqty.
21 jastaǵy Nuraı Serikbaıdy asa qatygezdikpen óltirgen, nekege turýǵa májbúrlegen jáne ańdyǵan Sherhan Aımahan ómir boıyna bas bostandyǵynan aıyryldy. Ol jazasyn qaýipsizdik deńgeıi joǵary túzeý mekemesinde óteıdi.
Úkimdi sot tóraǵasy Sammıdın Temiralıev jarııalady. Sot 28 jastaǵy Sherhan Aımahandy QR Qylmystyq kodeksiniń úsh baby boıynsha kináli dep tanydy. Atap aıtqanda:
• 99-baptyń 2-bóligi, 5-tarmaǵy – asa qatygezdikpen jasalǵan adam óltirý;
• 115-1-bap – stalkıng, ıaǵnı zańsyz ańdý;
• 125-1-bap – nekege turýǵa májbúrleý.
Sondaı-aq sot jábirlenýshi taraptyń azamattyq talap-aryzyna qatysty sheshim qabyldady.
Nuraı Serikbaıdyń týystary sottalýshydan 15 mln 739 myń 65 teńge materıaldyq shyǵyndy jáne 10 mlrd teńge moraldyq zııandy óteýdi talap etken. Sondaı-aq óndirilgen qarajatty qaıyrymdylyqqa baǵyttaýdy suraǵan.
Úkim ázirge zańdy kúshine engen joq.
Taraptar ne surady
Buǵan deıin memlekettik aıyptaýshy Sherhan Aımahandy taǵylǵan aıyptar boıynsha kináli dep tanyp, oǵan qaýipsizdik deńgeıi joǵary túzeý mekemesinde óteý úshin ómir boıyna bas bostandyǵynan aıyrý jazasyn taǵaıyndaýdy suraǵan.
Jábirlenýshi tarap ta eń joǵary jazany taǵaıyndaýdy talap etti. Al qorǵaý tarapy kisi ólimine deıingi birqatar aıypty daýlady.
Sottaǵy sońǵy sózinde Sherhan Aımahan Nuraıdyń ata-anasy men baýyrlarynan keshirim surap, ókinish bildirdi. Alaıda ol kisi óltirý sátin esine túsire almaıtynyn aıtty. Sottalýshy 15,7 mln teńgeden astam materıaldyq shyǵyndy óteýge kelisti. Al 10 mlrd teńge kólemindegi moraldyq ótemaqyny tóleý talabyn moıyndamady.
Eske salaıyq, 21 jastaǵy Nuraı Serikbaı bıyl 11 qańtarda Shymkentte qaza tapqan. Sherhan Aımahan qyzdy birneshe kún boıy úıiniń mańynda ańdyp, oǵan 35 ret pyshaq jaraqatyn salǵan. Nuraı alǵan jaraqattarynan oqıǵa ornynda kóz jumdy.
Aımahan eki táýlikten keıin qala syrtynan ustaldy. Oǵan nekege turýǵa májbúrleý, stalkıng jáne asa qatygezdikpen adam óltirý baptary boıynsha aıyp taǵyldy.
Tergeý barysynda kisi ólimine deıin Nuraıdyń uzaq ýaqyt boıy ańdyǵany anyqtaldy. Qaıǵyly oqıǵadan birneshe aı buryn sottalýshy Nuraıdy Almatydan Shymkentke májbúrlep nekege turǵyzý maqsatynda alyp ketken. Bul týraly qyzdyń aǵalary bilip, polıtsııa shaqyrǵan.
Oqıǵa ornyna kelgen tergeýshiler Aımahandy qyzdy alyp ketkeni úshin jaýapqa tartpaǵan. Onyń ornyna Nuraıǵa Sherhan Aımahanǵa eshqandaı shaǵymy joq ekeni týraly beınetúsinikteme jazdyrǵan.
Jas qyzdyń ólimi qoǵamda úlken rezonans týdyrdy. Memleket basshysy Ulttyq quryltaı otyrysynda qyz alyp qashýdy qatygez qylmys dep atap, kináliler ádil jazasyn alýy kerek ekenin aıtty.
Osy oqıǵadan keıin Shymkent qalasy Polıtsııa departamentiniń bastyǵy men onyń birinshi orynbasary qyzmetinen bosatyldy. Birneshe polıtsııa qyzmetkeri ishki ister organdarynan shyǵaryldy.
Іshki ister mınıstrligi qyzdyń nekege turýǵa májbúrlegeni týraly aryzyn tıisti deńgeıde tirkemegen polıtsııa qyzmetkerleriniń salǵyrttyǵyna qatysty bólek qylmystyq is qozǵady.
12 maýsymda tergeý aıaqtalyp, qylmystyq istiń 19 tomy Shymkent qalasynyń qylmystyq ister jónindegi mamandandyrylǵan aýdanaralyq sotyna joldandy. Sot úkim shyǵarǵanǵa deıin alty otyrys ótkizdi.
