Nuraı Serikbaı isi: Saraptama qorytyndysy, beınejazba men hat almasýlar neni kórsetti
ShYMKENT. KAZINFORM – Shymkentte 21 jastaǵy Nuraı Serikbaıdy óltirý isi boıynsha sot protsesi jalǵasyp jatyr. Kýálardy suraý aıaqtalǵannan keıin sot qylmystyq is materıaldaryn zertteýge kiristi. Búginge deıin úsh tom qaralyp, 7 tamyzdan bastap qalǵan 16 tomdy zerdeleý bastaldy.
Sot otyrysyndaǵy negizgi epızodtardyń biri – Nuraıdy «alyp qashý» rásimimen alyp ketkennen keıin túsirilgen beınejazbaǵa júrgizilgen sot-psıhologııalyq-lıngvıstıkalyq saraptamanyń qorytyndysyn jarııalaý boldy. Qarataý aýdandyq polıtsııa basqarmasynda túsirilgen vıdeoda qyz Sherhan Aımahannyń kóligine óz erkimen otyrǵanyn jáne oǵan eshqandaı shaǵymy joq ekenin aıtqan.
Sot tóraǵasy Sammıdın Temiralıev sarapshylardyń qorytyndysyn oqyp berdi. Onda qyzdyń sózinen aldyn ala daıyndalǵan mátin belgileri anyqtalǵany aıtylǵan.
– Onyń birizdi ári logıkalyq baıandalǵan áńgimesinde jazbasha sóıleýge tán kúrdeli sıntaksıstik qurylymdar, óz oıyn jetkizýde derbes bastamanyń bolmaýy, sondaı-aq birqalypty sóıleý máneri men kidiristerdiń bolǵany anyqtalǵan. Bul onyń sózi aldyn ala daıyndalǵanyn jáne oılastyrylǵan elementterdi qamtıtynyn kórsetedi, – dedi sýdıa saraptama qorytyndysyn oqyp.
Sot tóraǵasy Nuraıdyń «óz erkimmen keldim» degen sózine de erekshe toqtaldy.
– Nuraı Serikbaı bul sózderdi óz erkimen aıtty ma álde bireýdiń yqpalymen aıtty ma degen suraq týyndaıdy. Sarapshylardyń qorytyndysyna sáıkes, onyń sózi aldyn ala daıyndalǵan mátin sıpatynda bolǵan, – dedi Sammıdın Temiralıev.
Osydan keıin sot Nuraı Serikbaıdyń 2025 jyldyń qazan aıyndaǵy oqıǵalardan keıin polıtsııaǵa jazǵan aryzdaryn zertteýge kiristi.
Sot tóraǵasy Qarataý aýdandyq polıtsııa basqarmasynyń bastyǵyna joldanǵan aryzdy jarııalady. Onda qyz ózin alyp qashý jaǵdaılaryn egjeı-tegjeıli sıpattaǵan.
Qujatqa sáıkes, Almatydan kelgennen keıin Sherhan Aımahan ony úıine aparýdyń ornyna týystarynyń úıine ákelip, erkinen tys ustap, uıaly telefonyn alyp qoıǵan.
– Men úıge jiberýin suraǵan kezde, ol meniń iPhone 15 telefonymdy kúshpen alyp qoıyp, «Men seni zorlyqpen alyp keldim» dedi. Ony zańǵa sáıkes jaýapkershilikke tartýdy suraımyn, – delingen Nuraıdyń sotta oqylǵan aryzynda.
Qujat jarııalanǵannan keıin jábirlenýshi taraptyń advokaty sottalýshydan aryz mazmunyna qatysty túsinikteme berýin surady. Sherhan Aımahan jaýap retinde Nuraımen jazysqan hattaryna qaıta silteme jasap, aryzdaǵy jaǵdaılar shyndyqqa sáıkes kelmeıdi dep málimdedi.
Al jábirlenýshi taraptyń ókili sot nazaryn hat almasýlarǵa aýdardy. Onda aryz jazylǵannan keıin kóp uzamaı sottalýshy Nuraıdyń ákesine qyzdyń basqa mátin jazýǵa májbúr bolǵanyn aıtqany kórsetilgen.
Keıin sot sottalýshynyń anasynyń telefonynan tabylǵan hat almasýlardy zerttedi.
Oqylǵan habarlamalardan 5 qazanda týystary Sherhannyń Nuraımen birge kelýin talqylaǵany, ýaqytyn naqtylaǵany jáne qyzdy úıde qarsy alýǵa daıyndyq jasaǵany kórinedi. Anasy ulynyń qaı jerde ekenin surap, belgili bir ýaqytqa kelýin ótingen, sondaı-aq birge keletin adamdardyń daıyndyǵyn naqtylaǵan.
Jábirlenýshi taraptyń pikirinshe, bul hat almasýlar Nuraıdyń Aımahannyń úıine kelýi onyń týystarymen aldyn ala kelisilgenin kórsetedi. Sonymen qatar sot Serikbaılar otbasynyń telefonyndaǵy málimetterdi de zerttedi.
Materıaldarǵa sáıkes, 4 qazan kúni keshke ata-anasy men týystary Nuraıǵa birneshe ret habarlasýǵa tyrysqan, biraq baılanysa almaǵan. Qyzdyń telefony uzaq ýaqyt óshirýli bolǵan. Keıin onyń nómirinen habarlamalar kele bastaǵan.
Habarlamalardyń birinde: «Anashym, meniń toıym sizderdiń ruqsattaryńyzsyz ótti. Men muny qalamadym…» – dep jazylǵan.
Sot tóraǵasy bul habarlamalar kelgenge deıin týystary qyzdyń joǵalǵany týraly polıtsııaǵa aryz berýge daıyndalyp jatqanyn atap ótti.
Sot otyrysynda sottalýshynyń burynǵy jáne qazirgi jaýaptaryndaǵy qaıshylyqtar zerdelendi. Tergeý barysynda Aımahan Nuraımen tanysýy, olardyń qarym-qatynasy, alyp qashýǵa deıingi oqıǵalar jáne qylmys bolǵan kún týraly egjeı-tegjeıli aıtqan. Alaıda sot barysynda ol birneshe ret bolǵan oqıǵanyń mańyzdy tustaryn esinde joq ekenin málimdedi.
Memlekettik aıyptaýshy da osyǵan nazar aýdardy. Prokýror sottalýshynyń bastapqy jaýaptaryn qysymmen bergenin aıtatynyn eske saldy. Biraq dál sol jaýaptarynda ol pyshaqpen jeti-segiz ret urǵanyn aıtqan, al tergeý barysynda 35 pyshaq jaraqaty anyqtalǵan.
– Eger siz aıtqandaı, jaýaptaryńyz qysym kórsetý arqyly alynǵan bolsa, onda nege jeti-segiz ret urdym dedińiz? Eger sizdi ózińizge jala jabýǵa májbúrlegen bolsa, sizge barlyq 35 soqqyny moıyndatar edi. Nelikten olaı bolmady? – dep surady prokýror.
Sottalýshy bul sózderdi oǵan tergeý qyzmetkerleri aıtyp bergenin málimdedi.
Prokýror sondaı-aq eger sottalýshyǵa shynymen qysym jasalǵan bolsa, tergeýshiler ony istiń basqa da mán-jaılaryn moıyndaýǵa májbúr ete alatynyn atap ótti.
– Demek, ondaı jaǵdaı bolmaǵan ǵoı? – dep naqtylady memlekettik aıyptaýshy.
– Bolǵan joq, – dep jaýap berdi Aımahan.
Prokýror sottalýshynyń pyshaq jaraqatyn salý faktisin moıyndaǵanymen, qylmys mán-jaılaryn esinde joq dep otyrǵan qaıshylyǵyna toqtaldy.
Sot otyrysy aıaqtalǵannan keıin jábirlenýshi taraptyń advokaty Aıanhan Omarov jýrnalısterge zerttelgen materıaldar sottalýshynyń ustanymyn joqqa shyǵaratynyn aıtty.
– Búgin is materıaldaryn zertteý barysynda bul qylmysty Nuraı Serikbaıǵa dál sottalýshy jasaǵany anyqtaldy. Onyń pyshaq jaraqatyn salǵan sátti esime túsire almaımyn degen ýájderi rastalǵan joq. Búkil protsess barysynda ol jaýaptaryn ózgertip, óz sózine ózi qaıshy keldi, – dedi advokat.
Omarovtyń aıtýynsha, sottalýshynyń bastapqy moıyndaý jaýaptary qysym arqyly alynǵany týraly málimdemeleri de dáleldenbegen.
– Eger adam ózine zańsyz yqpal jasaldy dep eseptese, zań oǵan tergeý áreketterine shaǵymdaný múmkindigin beredi. Mundaı shaǵymdar berilgen joq, – dedi advokat.
Eske sala keteıik, Sherhan Aımahan Nuraı Serikbaıdy «alyp qashý» rásimi arqyly nekege májbúrleý, ańdý jáne erekshe qatygezdikpen jasalǵan adam óltirý boıynsha aıyptalyp otyr.
