Nuraı Serikbaı isi: ómir boıyna sottalǵan Aımahannyń qorǵaýshylary úkimge shaǵymdandy
ShYMKENT. KAZINFORM — Nuraı Serikbaıdyń ólimine qatysty is boıynsha Sherhan Aımahannyń qorǵaýshylary ómir boıyna bas bostandyǵynan aıyrý týraly sot úkimine apellıatsııalyq shaǵym túsirdi.
Bul týraly marqumnyń aǵasy Sultan Serikbaı men jábirlenýshi taraptyń advokaty Aıanhan Omarov málimdedi. Olardyń aıtýynsha, habarlama «Sot kabıneti» arqyly kelgen.
— Іs aıaqtalyp, sot úkimi shyqqannan beri eki aptadan astam ýaqyt ótti. Osy aralyqta ekinshi taraptyń apellıatsııalyq shaǵym berýge quqyǵy boldy. 28 tamyzda biz tıisti habarlama aldyq. Olardyń advokattary apellıatsııalyq shaǵym bergen. Apellıatsııalyq satydaǵy sottyń ókilettigi keń. Ol birinshi satydaǵy sottyń úkimin tolyǵymen joıyp, jańa sheshim shyǵara alady. Atap aıtqanda, aıyptaýdyń jekelegen baptaryn alyp tastaýy, jańa baptar qosýy nemese jazany jeńildetýi múmkin, — dedi Sultan Serikbaı.
Advokat Aıanhan Omarov isti qaıta qaraý kezinde jasalýy múmkin protsessýaldyq áreketterge túsinikteme berdi.
— QR Qylmystyq-protsestik kodeksiniń 430-baby 1-bóliginiń 2-tarmaǵyna sáıkes, apellıatsııalyq sot alqasy qylmystyq is boıynsha sot-psıhıatrııalyq nemese ózge de saraptama taǵaıyndaı alady. Mundaı sheshimniń qabyldanatyny isti apellıatsııalyq ınstantsııada qaraý barysynda belgili bolady, — dedi Aıanhan Omarov.
Jábirlenýshi taraptyń ókilderi isti apellıatsııalyq satyda qaraýǵa daıyndalyp jatyr.
— Shaǵymdy zerdelep, oǵan qatysty ýájderimizdi ázirleımiz. Jaqyn arada is apellıatsııalyq ınstantsııa sotynda qaralady, — dedi Aıanhan Omarov.
Sondaı-aq Nuraı Serikbaıdyń ólimine qatysty istiń sotynda kýálik bergen Qarataý aýdandyq polıtsııa basqarmasynyń burynǵy tergeýshisi Ábilǵazy Artyqbaıǵa qatysty qylmystyq is qozǵalǵany belgili boldy. Tergeý jalǵasyp jatyr. Іske qatysty ózge málimetter QR QPK-niń 201-babyna sáıkes ázirge jarııalanbaıdy.
Artyqbaı buǵan deıin qyzdyń ólimine qatysty sotta jaýap bergen. Ol 2025 jyldyń kúzinde Nuraıdyń týystary polıtsııaǵa habarlasqannan keıin shaqyrtý boıynsha oqıǵa ornyna barǵan. Sot barysynda Nuraıdyń polıtsııa bóliminde onyń jazbasha kelisiminsiz beınetaspaǵa túsirilgeni anyqtaldy. Alaıda bul fakt tergeýshiniń protsessýaldyq hattamasynda kórsetilmegen. Polıtsııa qyzmetkeri keýde beınetirkegishindegi jazbalardyń saqtalmaýyn akkýmýlıatordyń otyryp qalýymen túsindirgen. Marqumnyń aǵasy sotta tergeýshi Nuraıǵa qysym kórsetkenin málimdegen.
Eske salaıyq, stýdent Nuraı Serikbaı 2026 jylǵy 11 qańtarda Shymkentte qaza tapty. Sot anyqtaǵandaı, Sherhan Aımahan qyzdy úıiniń mańynda kútip turyp, oǵan pyshaqpen 35 ret jaraqat salǵan.
Tergeý málimetterine sáıkes, kisi óltirýge deıin Nuraıdy uzaq ýaqyt boıy ańdyǵan. Qaıǵyly oqıǵadan birneshe aı buryn Aımahan qyzdy Almatydan Shymkentke kúsh qoldanyp alyp ketip, májbúrli túrde nekege turǵyzbaq bolǵan.
Oqıǵa ornyna kelgen polıtsııa qyzmetkerleri Sherhan Aımahandy adam urlaǵany úshin jaýapkershilikke tartpaǵan. Keıin sot-psıhologııalyq saraptama Nuraıdyń beınetúsirilimdegi túsiniktemesine kúmán keltirgen.
Іshki ister mınıstrligi Nuraıdyń otbasynyń ótinishimen buryn jumys istegen Shymkent polıtsııa qyzmetkerleriniń yqtımal qyzmettik salǵyrttyǵy faktisi boıynsha jeke qylmystyq is qozǵaǵan.
Shymkent qalasy polıtsııa departamentiniń bastyǵy men onyń birinshi orynbasary qyzmetterinen bosatyldy, birneshe qyzmetker ishki ister organdarynan jumystan shyǵaryldy.
13 tamyzda Shymkent qalasynyń qylmystyq ister jónindegi mamandandyrylǵan aýdanaralyq soty Sherhan Aımahandy Nuraı Serikbaıdy óltirgeni, nekege turýǵa májbúrlegeni jáne ańdyǵany úshin ómir boıyna bas bostandyǵynan aıyrýǵa úkim shyǵardy.
Birinshi satydaǵy sottyń úkimi zańdy kúshine áli engen joq. Taraptardyń ony 15 táýlik ishinde apellıatsııalyq tártippen shaǵymdanýǵa quqyǵy bolǵan.
Úkim jarııalanǵannan keıin Aımahannyń qorǵaýshylary sot sheshimimen tolyq kelispeıtinderin málimdegen. Sol kezde advokattar úkimniń tolyq mátinin alyp, zerttegennen keıin apellıatsııalyq shaǵym berý máselesin sheshetinderin aıtqan.
