Nuraı Serikbaı isi: cýdıa aıyptalýshynyń jaýaptaryndaǵy qaıshylyqtarǵa toqtaldy
ShYMKENT. KAZINFORM — Shymkentte 21 jastaǵy Nuraı Serikbaıdyń ólimine qatysty qylmystyq is boıynsha sot otyrysynda sýdıa Sammıdın Temirálıev aıyptalýshy Sherhan Aımahannyń sotqa deıingi tergeý kezinde advokatynyń qatysýymen bergen jaýap alý hattamalaryn jarııa etip, olardyń sottaǵy qazirgi aıǵaqtarymen sáıkes kelmeıtinin atap ótti.
Sot otyrysynda jábirlenýshi taraptyń ókili Aıanhan Omarov birqatar mańyzdy ótinishhatty oqyp berdi.
Іs materıaldaryn zertteý barysynda sýdıa aıyptalýshynyń burynǵy jaýap alý hattamalarynyń birin jarııalady. Qujatqa sáıkes, aıyptalýshy tergeý barysynda oqıǵa bolǵan kúngi áreketterin egjeı-tegjeıli sıpattaǵan. Nuraıdyń úıine qalaı kelgenin, kóliginen uzyndyǵy shamamen 25 santımetr bolatyn pyshaqty alǵanyn, dúken mańynda turǵan qyzdy kórip, sońynan erip baryp, oǵan pyshaqpen birneshe ret jaraqat salǵanyn aıtqan.
Odan keıin alǵashqy aıǵaqtaryna sáıkes, ol kóligine otyryp, Saıram aýdanynyń Qasymbek aýylyna ketken. Sol jerde pyshaqpen óz qolyn jaraqattaýǵa áreket jasaǵan. Budan soń hattamada kórsetilgendeı, ol aýyl mańyndaǵy saıda bolǵan, keıin sol jerden polıtsııa qyzmetkerleri ustaǵan.
Sýdıa bul aıǵaqtardyń sottaǵy qazirgi nusqamen múlde sáıkes kelmeıtinin aıtty. Sebebi sotta Aımahan oqıǵany esine túsire almaıtynyn, affekt kúıinde bolǵanyn jáne alǵashqy pyshaq jaraqatyn ózine Nuraıdyń salǵanyn málimdegen.
— Burynǵy jaýaptaryńyzda oqıǵany basynan aıaǵyna deıin anyq eske alǵansyz. Sol kezdegi kıimińizdi, pyshaqtyń uzyndyǵyn, áreketterińizdiń retin, qaıda barǵanyńyzdy, qarýdy qaıda qaldyrǵanyńyzdy aıtqansyz. Al búgin eshteńe esimde joq deısiz. Muny qalaı túsindiresiz? — dep surady sýdıa Sammıdın Temirálıev.
Aımahan hattamany tergeýshi men prokýror jazǵanyn aıtyp, túsiniksiz jaýap berýge tyrysty. Buǵan jaýap retinde sýdıa jaýap alý advokattyń qatysýymen ótkenin, hattamaǵa advokattyń qol qoıǵanyn jáne tergeý áreketi beınejazbaǵa túsirilgenin eske saldy.
— Eger muny tergeýshi jazdy deseńiz de, janyńyzda advokatyńyz bolǵan. Munda bári retimen jáne tolyq kórsetilgen. Qaı jaýabyńyz durys? — dep surady sýdıa.
Aıyptalýshy tek sotta berip otyrǵan qazirgi aıǵaqtaryn ǵana shynaıy dep sanaıtynyn, al jarııalanǵan hattamanyń mazmunyn moıyndamaıtynyn aıtty.
Sonymen qatar sot taǵy bir qaıshylyqqa nazar aýdardy. Hattamalardyń birinde Aımahan Nuraıdy Almatydan alyp kelgende týystaryna onyń keletinin aldyn ala aıtyp, daıyndalýdy ótingenin kórsetken.
Al basqa jaýabynda úıge kelgende eshqandaı daıyndyq bolmaǵanyn málimdegen.
— Siz jaqyndaryńyzǵa: «Daıyndalyńdar», — degensiz, biraq keıin úıde eshteńe daıyn bolmaǵanyn aıtasyz. Qaı jaýabyńyz durys? — dep surady sýdıa.
Jábirlenýshi tarap «ekinshi pyshaq» týraly nusqany joqqa shyǵardy
Jábirlenýshi taraptyń ókili, advokat Aıanhan Omarov sotta aıyptalýshynyń nusqasyna, saraptamalarǵa jáne dáleldemelerge qatysty birneshe ótinishhat berdi.
Alǵashqy ótinishhat Aımahannyń alǵashqy pyshaq jaraqatyn ózine Nuraı saldy degen sózine qatysty boldy. Advokattyń aıtýynsha, bul nusqa medıtsınalyq qujattarmen tolyqtaı joqqa shyǵarylady.
2026 jylǵy 16 qańtardaǵy sot-medıtsınalyq saraptama qorytyndysynda aıyptalýshy qolyndaǵy jáne ish tusyndaǵy jaraqattardy ózine ádeıi salǵanyn túsindirgen. Osyndaı málimetter Shymkent qalalyq № 1 klınıkalyq aýrýhanasynyń medıtsınalyq qujattarynda da kórsetilgen.
— Eger Nuraı shynymen aıyptalýshyǵa pyshaqpen shabýyl jasaǵan bolsa, bul alǵashqy medıtsınalyq qujattarda, saraptama qorytyndysynda jáne onyń bastapqy jaýaptarynda mindetti túrde kórsetiler edi, biraq is materıaldarynda mundaı derekter joq, — dedi jábirlenýshi taraptyń ókili.
Advokat sottan Aımahannyń qazirgi aıǵaqtaryn medıtsınalyq qujattarmen salystyryp, anyqtalǵan qaıshylyqtarǵa quqyqtyq baǵa berýdi jáne dáleldenbegen málimdemelerdiń marqumnyń ar-namysyna nuqsan keltirý quralyna aınalýyna jol bermeýdi surady.
— Nuraı Serikbaı bul sotta ózin qorǵaı almaıdy. Іs materıaldaryndaǵy obektıvti dálelder, kýágerlerdiń aıǵaqtary, sarapshylardyń qorytyndylary jáne basqa da protsestik qujattar bul jaıttardy rastaıdy, — dedi Aıanhan Omarov.
Anatomııalyq manekendi paıdalaný usynyldy
Kelesi ótinishhat sot-medıtsınalyq saraptamaǵa qatysty boldy. Saraptamaǵa sáıkes, Nuraıdyń denesinen 35 kesilgen jáne suǵylǵan jaraqat anyqtalǵan.
Jábirlenýshi tarap saraptamany júrgizgen sot-medıtsınalyq sarapshy J. Pernebekovti sotqa shaqyryp, ólimge sebep bolǵan jaraqattardyń ornalasýyn, baǵytyn jáne tereńdigin egjeı-tegjeıli túsindirýdi surady.
Sonymen qatar jábirlenýshi tarap sot otyrysynda marqumnyń denesiniń fotosýretteri men beınejazbalaryn kórsetpeýdi surady. Onyń ornyna advokat anatomııalyq manekendi paıdalanyp, sarapshyǵa barlyq jaraqattardyń ornalasýyn qara markermen belgilep kórsetýin usyndy. Marqumnyń otbasy manekendi óz qarajatyna satyp alyp, sotqa usynýǵa daıyn ekenin jetkizdi.
— Bul sotqa saraptama qorytyndysyn kórneki túrde zertteýge múmkindik beredi jáne marqumnyń qadir-qasıetin saqtap, onyń ata-anasy men jaqyndarynyń psıhologııalyq jaǵdaıyn eskerýge yqpal etedi, — delingen ótinishhatta.
«Affekt» máselesi boıynsha sarapshylardy sotqa shaqyrý suraldy
Jeke ótinishhat Almaty qalasyndaǵy Sot saraptamalary ınstıtýtynyń mamandary júrgizgen № 5849 keshendi psıhologııalyq-psıhıatrııalyq saraptamaǵa qatysty boldy.
Aıanhan Omarov sottan psıhıatrlar men psıhologtardy (J. Zagıtova, A. Sýbhanberdına, N. Grıneva, T. Seıtek jáne K. Qojamjarova) sotqa shaqyryp, óz qorytyndylaryn sotta túsindirýdi surady.
Іs materıaldaryna sáıkes, sarapshylarǵa Aımahan qylmys jasaǵan sátte affekt kúıinde boldy ma degen suraq qoıylǵan. Komıssııa onyń fızıologııalyq affekt kúıinde bolmaǵanyn, óz áreketteriniń sıpaty men qaýiptiligin tolyq túsingenin jáne olardy basqarý qabiletin saqtaǵanyn kórsetken.
Jábirlenýshi tarap sarapshylardyń sotqa affekt kúıin anyqtaıtyn ǵylymı ólshemderdi jáne aıyptalýshynyń áreketteri (pyshaqty aldyn ala alyp júrýi, maqsatty túrde kelýi, kóptegen soqqy jasaýy jáne oqıǵa ornynan qashýy) mundaı kúımen nege úılespeıtinin túsindirip berýin surady.
Qylmys quralyna qatysty ótinishhat
Taǵy bir ótinishhat qylmys quraly retinde tanylǵan «Korshýn-2» markaly, «Kızlıar» zaýytynda shyǵarylǵan pyshaqqa qatysty boldy.
Jábirlenýshi taraptyń ókili Shymkent qalalyq polıtsııa departamentiniń krımınalısi G. Jumaǵulovty sotqa shaqyrýdy surady. Ol pyshaqqa zertteý júrgizgen maman retinde onyń tehnıkalyq jáne konstrýktsııalyq erekshelikterin, negizgi maqsatyn, jasyryn alyp júrý múmkindigin, sondaı-aq saraptamada kórsetilgen 35 aýyr jaraqatty salý qabiletin túsindirýge tıis.
Ótinishhattar boıynsha protsessýaldyq sheshim kelesi sot otyrysynda qabyldanady.
Іsti qaraý jalǵasyp jatyr. Kelesi kezeńde sot Nuraıdyń jaqyn qurbysy Álııa Serik pen týysy Dáýren Jarylqasynnyń aıǵaqtaryn zertteýge kóshedi.
31 shildede sotta oqıǵa kýágeri, sondaı-aq qaza tapqan 21 jastaǵy Nuraı Serikbaıdyń aǵalary jaýap bergen edi.
Eske salsaq, 11 qańtar kúni Shymkentte 21 jastaǵy stýdent Nuraı Serikbaı qaza tapty.
Tergeý málimetinshe, aıyptalýshy qyzǵa 35 ret pyshaq jaraqatyn salǵan.
Sherhan Aımahanǵa nekege turýǵa májbúrleý, stalkıng jáne asa qatygezdikpen adam óltirý baptary boıynsha aıyp taǵylǵan. Aıyptar dáleldengen jaǵdaıda, oǵan ómir boıyna bas bostandyǵynan aıyrý jazasy taǵaıyndalýy múmkin.
