Nuraı Serikbaı isi: burynǵy tergeýshi «alyp qashýdan» keıingi polıtsııa áreketi týraly aıtty
ShYMKENT. KAZINFORM — Nuraı Serikbaı isi boıynsha sotta Qarataý aýdandyq polıtsııa basqarmasynyń burynǵy tergeýshisi Ábilǵazy Artyqbaı 2025 jylǵy qazandaǵy «alyp qashý» týraly habarlamany polıtsııa qalaı teksergenin aıtyp berdi.
Ábilǵazy Artyqbaıdyń aıtýynsha, polıtsııa qyzmetkerleri oqıǵa ornyna barǵannan keıin Nuraımen sóılesip, odan jaýap alǵan. Onyń sózinshe, qyz óz erkimen kelgenin jáne eshkimge shaǵymy joq ekenin aıtqan.
Kýágerdiń málimdeýinshe, oqıǵa bolǵan kúni saǵat shamamen 20:00–20:30 aralyǵynda polıtsııaǵa Nuraıdyń aǵalary habarlasqan. Olar qaryndasyn «alyp qashyp ketkenin» jetkizgen.
Polıtsııa qyzmetkerleri Shymkent qalasynyń Qarataý aýdanyndaǵy úıge barǵan. Qaqpa aldynda olardy Nuraıdyń eki aǵasy qarsy alyp, qaryndasyn bul úıge erkinen tys ákelgenin aıtqan.
Burynǵy tergeýshiniń aıtýynsha, úıdiń ishinde kóp adam bolǵan jáne toıǵa daıyndyq júrip jatqan.
— Biz qyzdyń qaı jerde ekenin suradyq. Bizdi bólmege kirgizdi. Ol jerde Nuraı jáne birneshe kishkentaı qyz bala boldy. Barlyǵyn syrtqa shyǵaryp, onymen jeke sóılestik, — dedi Ábilǵazy Artyqbaı.
Onyń sózinshe, Nuraı Sherhandy jigiti ekenin, onymen kezdesip júrgenderin aıtqan. Al polıtsııa qyzmetkerleriniń suraǵyna ol bul jerge óz erkimen kelgenin jetkizgen.
Kýáger qosymsha suraqtarǵa jaýap berý barysynda Nuraıdyń janynda uıaly telefony bolǵanyn da aıtty.
— Telefonyna qońyraýlar tústi, alaıda ol eshkimge jaýap bermedi, — dedi ol.
Odan keıin, Artyqbaıdyń sózinshe, Nuraı men Sherhandy Qarataý aýdandyq polıtsııa basqarmasyna jetkizip, olardan bólek jaýap alǵan.
Burynǵy tergeýshiniń aıtýynsha, eki jastyń túsiniktemeleri bir-birine sáıkes kelgen.
— Olar keshke kezdesýge keliskenin, keıin otbasy qurý týraly sheshim qabyldaǵandaryn aıtty, — dedi ol.
Artyqbaı sonymen birge jaýap alýdan keıin Nuraı eshkimge shaǵymy joq ekenin jazbasha kórsetkenin, túsinikteme bergenin jáne onyń sózderi beınejazbaǵa túsirilgenin málimdedi.
Alaıda kýágerdiń aıtýynsha, kelesi kúni qyzdyń otbasy aryzdanǵannan keıin materıaldar qaıta tekserilgen.
Burynǵy tergeýshi Qarataý aýdanynyń prokýrory Altynbek Nurmanalıev Nuraıdan aldymen ákesiniń qatysýymen, keıin jeke túrde qaıta jaýap alǵanyn aıtty.
— Prokýror odan polıtsııa qyzmetkerleri nemese tergeýshi qysym kórsetti me dep surady. Nuraı túsiniktemeni ózi jazǵanyn aıtty. Al nege aryz berilgenin suraǵanda, bul áreketti ákesi men aǵalarynyń ótinishi boıynsha jasaǵanyn, óıtkeni olar bolǵan jaǵdaıdy nazardan tys qaldyrýǵa bolmaıdy dep eseptegenin jetkizdi, — dedi Ábilǵazy Artyqbaı.
Sottaǵy jaýap alý barysynda advokattar polıtsııa kelgen kezde Nuraıdyń janynda kim bolǵanyn da naqtylady. Burynǵy tergeýshiniń aıtýynsha, bólmede tek Nuraı men birneshe kishkentaı qyz bolǵan, al sottalýshy Sherhan Aımahan ol jerde bolmaǵan.
Sonymen qatar kýáger Nuraıdyń aǵalary áýel bastan bul nekege qarsy bolǵanyn rastady.
— Olar Nuraı men Sherhannyń otbasy qurýyna qarsy ekenderin aıtty, — dedi Artyqbaı.
Burynǵy tergeýshini suraý aıaqtalǵannan keıin sot Sherhan Aımahannyń týystarynyń jaýaptaryn tyńdaýǵa kóshti. Sot otyrysynyń bul tusy emotsııaǵa toly boldy.
Buǵan deıin Nuraı Serikbaıdyń ata-anasy sotta qyzǵa «alyp qashý» áreketinen keıin psıhologııalyq qysym jasalǵanyn, polıtsııada ony shaǵymynan bas tartýǵa kóndirgenin aıtqan edi. Sot oqıǵa mán-jaılaryn zertteýdi jalǵastyryp jatyr.
Eske salaıyq, 21 jastaǵy Nuraı Serikbaı 2026 jylǵy 11 qańtarda Shymkenttegi úıiniń janynda qaza tapqan. Tergeý nusqasy boıynsha, Sherhan Aımahan buǵan deıin qyzdy «alyp qashý» arqyly nekege májbúrleýge áreket jasaǵan jáne oǵan 35 ret pyshaq jaraqatyn salǵan.
Sottalýshyǵa úsh bap boıynsha, onyń ishinde adam óltirý jáne nekege turýǵa májbúrleý boıynsha aıyp taǵylǵan.
