Nuraı Serikbaı isi: alǵashqy sot otyrysynyń kúni belgili boldy
ShYMKENT. KAZINFORM – Shymkentte 21 jastaǵy Nuraı Serikbaıdyń ólimine qatysty qylmystyq is boıynsha alǵashqy sot otyrysynyń kúni belgilendi.
Aldyn ala tyńdaý 21 shilde kúni saǵat 10:00-de Shymkent qalasynyń qylmystyq ister jónindegi mamandandyrylǵan aýdanaralyq sotynda ótedi.
Jábirlenýshi taraptyń múddesin advokattar Aıanhan Omarov pen Muhammedjan Ahmetov qorǵaıdy.
– Aldyn ala tyńdaý barysynda sot isti máni boıynsha qaraýǵa taǵaıyndaý máselesin sheshedi. Sondaı-aq dáleldemelerdi zertteý tártibi aıqyndalyp, sot protsesine alqabılerdiń qatysý múmkindigi qaralady, – dedi advokat Aıanhan Omarov.
Jábirlenýshi tarap ókilderi sot protsesiniń barynsha ashyq ótýin jáne sot otyrystarynyń onlaın-translıatsııasyn qamtamasyz etýdi suraıtynyn málimdedi.
Eske salaıyq, bıyl 11 qańtarda Shymkentte 21 jastaǵy stýdent Nuraı Serikbaı qaza tapty. Tergeý málimetinshe, qyzben tanys bolǵan 28 jastaǵy Sherhan Aımahan ony dúken mańynda kútip, birneshe ret pyshaq jaraqatyn salǵan. Keıin kúdikti qaladan shamamen 10 shaqyrym jerde ustalyp, tergeý ızolıatoryna qamaldy.
Іs qoǵamda rezonans týdyrǵannan keıin Prezıdent tapsyrmasymen Shymkent qalasy polıtsııasy qyzmetkerleriniń áreketine tekserý júrgizildi.
Sondaı-aq Іshki ister mınıstrligi qyzdyń nekege turýǵa májbúrleý týraly aryzynan keıin tıisti shara qoldanbaǵan polıtseılerge qatysty salǵyrttyq faktisi boıynsha jeke qylmystyq is qozǵady.
Keıin kúdiktige taǵylǵan aıyp asa qatygezdikpen jasalǵan adam óltirý babyna qaıta saralandy. Sonymen qatar stalkıng jáne nekege turýǵa májbúrleý baptary boıynsha da tergeý júrgizildi. Bul baptar boıynsha eń aýyr jaza – ómir boıyna bas bostandyǵynan aıyrý.
Tergeý barysynda kúdikti sot-psıhıatrııalyq saraptamadan ótip, esi durys dep tanyldy.
12 maýsymda tergeý aıaqtalyp, qylmystyq is Shymkent qalasynyń qylmystyq ister jónindegi mamandandyrylǵan aýdanaralyq sotyna joldandy.
