Nurasyl Mádıár: Jastardyń azamattyq jaýapkershiligi naqty ispen kórinedi
ASTANA. KAZINFORM – Memleket basshysy Qazaqstannyń bolashaǵyn bilimdi, belsendi, progressıvti jáne maqsatshyl jastarmen baılanystyrady. Prezıdenttiń pikirinshe, jas býyn eldiń damýyna jaýapkershilikpen qarap, qoǵamǵa paıdaly bastamalarǵa belsendi aralasýy kerek.
Osy pikirge qatysty «Elorda úmiti» jastar qoǵamdyq birlestiginiń tóraǵasy Nurasyl Mádıár jastardyń azamattyq jaýapkershiligin kúndelikti ómirdegi naqty isterden kórýge bolatynyn aıtty.
Sonymen qatar ol jastar qoǵamdaǵy ózgeristerge syrttaı baqylaýshy bolmaı, óz ortasyndaǵy máselelerdi sheshýge belsendi aralasýy kerek ekenin atap ótti.
– Menińshe, bul oıdy ásirese azamattyq jaýapkershilik pen naqty iske qatysý turǵysynan túsingen jón. Jastardyń qoǵamǵa úlesi tek bilim alýmen nemese óz kásibinde jetistikke jetýmen shektelmeıdi. Qorshaǵan ortaǵa uqypty qaraý, erikti iske qatysý, qoǵamdyq máselege beıjaı qaramaý, óz aýlasynan, oqý ornynan, kóshesinen bastama kóterý de azamattyq mádenıettiń kórinisi, – dedi Nurasyl Mádıár.
Onyń aıtýynsha, jastardyń jaýapkershiligin kórsetýdiń bir baǵyty – ekologııalyq volonterlik.
– Osy turǵydan alǵanda, ekologııalyq volonterlik jastardyń jaýapkershiligin naqty ispen kórsetetin baǵyttardyń biri. Senbilikke bir ret qatysý mańyzdy, biraq odan da mańyzdysy - tazalyqty kúndelikti ádetke aınaldyrýǵa úles qosý. Mysaly, jastar ekologııalyq bastamalardy uıymdastyryp qana qoımaı, qoǵamdyq keńistikterdiń jaǵdaıyn baqylaýǵa, túsindirý jumystaryna, tsıfrlyq keri baılanysqa jáne jergilikti shaǵyn jobalarǵa qatysa alady, – dedi ol.
Nurasyl Mádıár bul máseleni «Adal azamat» ustanymymen de baılanystyrady. Onyń pikirinshe, azamattyq jaýapkershilik sózben emes, naqty áreketpen kórinedi.
– Memleket basshysy «Adal azamat» ustanymymen sabaqtas aıtylǵan bul oıdyń tájirıbelik máni de osynda dep esepteımin: jaýapkershilik sózden áreketke ótken kezde ǵana qoǵamdyq qundylyqqa aınalady. Sondyqtan jastarǵa artylatyn mindet - bárin birden ózgertý emes. Óz ortasyna jaýapkershilikpen qarap, bilimin, ýaqytyn jáne múmkindigin qoǵamǵa paıdaly iske baǵyttaı bilý. Eldiń bolashaǵy týraly aıtý mańyzdy, al sol bolashaqtyń qalyptasýyna búginnen bastap óz úlesin qosý - odan da mańyzdy, – dep túıindedi Nurasyl Mádıár.
Aıta keteıik, Memleket basshysy daryndy jastarǵa árdaıym qoldaý kórsetiletinin aıtqan edi.
