Nuraly Ábish: Bir úıdiń balasyndaı bolyp indettiń taralýyna jol bermeýimiz kerek
TÚRKІSTAN. QazAqparat - Túrkistan oblystyq máslıhatynyń depýtaty Nuraly Ábishtiń aıtýynsha, eldegi tótenshe jaǵdaı tolyqtaı Prezıdent baqylaýynda, dep habarlaıdy QazAqparat.
El Prezıdenti Qasym-Jomart Toqaev kúni keshe ǵana memlekettik komıssııa otyrysynda barsha qazaqstandyqtarǵa asa úlken senim men jaýapkershilik artylyp otyrǵanyna toqtalǵan bolatyn.
«Biz úkimet tarapynan qolǵa alynyp otyrǵan shekteýler men saqtaný sharalaryna barynsha qoldaý bildirip, túsinistik tanytyp, barlyq talaptardy oryndaýǵa tıispiz. Olaı etpegen jaǵdaıda qıyn jaǵdaıǵa tap bolýymyz múmkin. Sondaı-aq jalǵan aqparattarǵa senbeı, el ishinde úreı týǵyzbaýǵa, jurtty sabyrǵa shaqyryp, yntymaq, birlikke uıystyra bilýimiz kerek. Álemge qaýip tóndirip turǵan indetpen kúres júrgizý - tek medıtsına qyzmetkerleri men quqyq qorǵaý mamandarynyń ǵana emes, búkil qazaq qoǵamynyń mindeti. Endeshe biz bir qoldyń salasyndaı, bir úıdiń balasyndaı bolyp, zań talaptaryna baǵynyp, jeke bas gıgıenasy men tazalyǵyn saqtap, indettiń taralýyna jol bermeýge atsalysýymyz qajet», - deıdi oblystyq máslıhat depýtaty.
Onyń aıtýynsha, Qazaqstan memleketi indetpen kúres jumystaryn der kezinde qolǵa alyp, elordamyz ben Almatyda karantın engizdi. Bul - qýanarlyq jaıt.
«Adam kóp shoǵyrlanatyn saýda oryndary men oıyn-saýyq keshenderin,úlken bazarlardy japty. Maska jetispeýshiligin eskerip, kásipkerlerdi osy iske jappaı jumyldyra bildi. Qazirgi tańda maska jetispeýshiligi asa sezilip otyrǵan joq. Azyq-túlik baǵasy da úkimettiń jiti baqylaýynda. Barlyq qajetti azyq-túlik qory jasaqtalyp jatyr. Endigi mindet - osy qysyltaıań, qarbalas shaqta birligimizdi tanytyp, sabyrmen osy qıyn kezeńnen aman-esen shyǵa bilý. Bul is qazaq halqynyń qolynan keledi», - deıdi Nuraly Ábish.
