Nuraly Álip ulttyq qurama kapıtany bolýy múmkin be

ASTANA.KAZINFORM — Qazaqstan quramasynyń qorǵaýshysy Nuraly Álip 2026 jylǵy álem chempıonatynyń irikteý kezeńinde Ýels quramasymen ótetin matchqa arnalǵan baspasóz máslıhatyna qatysty. 

Sportshy aldaǵy oıynnyń mańyzdylyǵyn jáne komandalastarynyń jaǵdaıyn aıta kele, kapıtan máselesi týraly pikir bildirdi.

— Bas bapker atap ótkendeı, quram men kapıtan týraly sońǵy sheshim keshke qaraı qabyldanady. Kapıtan bolý — úlken jaýapkershilik. Uzaq ýaqyt boıy tájirıbeli Ashat Taǵybergen komanda kapıtany boldy. Maǵan osy mindetti senip tapsyrsa, naǵyz basshy bolýǵa tyrysamyn, — dedi ol.

Sonymen qatar fýtbolshy aldaǵy kásipqoı mansabyna qatysty suraqqa jaýap berdi.

— Árıne, árbir fýtbolshy óziniń deńgeıin kóterýge tyrysady. Dastan inimiz 18 jasqa tolǵanda Chelsı komandasynda óner kórsetedi. Qazaqstandyq fýtbolshylardyń basqa chempıonattarǵa baryp, bıik deńgeılerden kórinýin tileımin. Aldaǵy ýaqytta bári jaqsy bolady dep oılaımyn, — dedi qazaqstandyq qorǵaýshy.

Aıta keteıik, Qazaqstan quramasy álem chempıonaty irikteý kezeńi aıasynda 4 qyrkúıekte Astanada Ýels quramasymen kezdesedi.

Osyǵan deıin habarlaǵanymyzdaı, Qazaqstan ulttyq quramasynyń bas bapkeri Álı Álıev álem chempıonaty irikteý kezeńindegi aldaǵy eki oıynǵa shaqyrylǵan fýtbolshylardyń naqty tizimin jarııalady.