Nuralhan Kósherov túrkistandyq kásipkerlerge úndeý jasap, Prezıdent Joldaýyn iske asyrýǵa shaqyrdy
TÚRKІSTAN. KAZINFORM — Investıtsııa – ekonomıkanyń qozǵaýshy kúshi. Memleket basshysy Qasym-Jomart Toqaevtyń 2025 jylǵy «Jasandy ıntellekt dáýirindegi Qazaqstan: ózekti máseleler jáne ony túbegeıli tsıfrlyq ózgerister arqyly sheshý» atty Qazaqstan halqyna Joldaýy elimizdiń áleýmettik-ekonomıkalyq damýynyń jańa kezeńin aıqyndap, memlekettiń damý baǵytyn naqty belgilep berdi.
Joldaýda óńdeý ónerkásibin órkendetý, kásipkerlikke keń jol ashý, ınvestıtsııa tartý, tsıfrlyq ekonomıkany ilgeriletý syndy strategııalyq mańyzdy mindetter qoıyldy.
Osy oraıda, Túrkistan oblysynyń ákimi Nuralhan Kósherovtiń bastamasymen óńirde Joldaýdy júzege asyrýǵa arnalǵan keń aýqymdy májilis ótti. Іs-sharaǵa 100-den astam jergilikti kásipker qatysyp, Prezıdent tapsyrmalaryn iske asyrý tetikteri talqylandy. Oblys basshysy óz sózinde ınvestıtsııalyq ahýaldy jaqsartý, sheteldik jáne otandyq ınvestorlar úshin qolaıly jaǵdaı jasaý, jergilikti kásipkerlikti júıeli qoldaý – búginde el aldyndaǵy basty mindetterdiń biri ekenin atap ótti.
– Prezıdent Joldaýy – naqty isterdiń baǵdary, elimizdiń áleýmettik-ekonomıkalyq damýynyń jańa kezeńi. Bizdiń mindet – osy tapsyrmalardy sapaly ári tıimdi oryndaý. Bul baǵytta barlyǵymyz birlese eńbek etýimiz qajet, Memleket basshysy Joldaýda shıkizattyq emes sektordy damytý – strategııalyq basymdyq ekenin qadap aıtty. Ásirese óńdeý ónerkásibin ilgeriletý arqyly biz ulttyq ekonomıkanyń turaqtylyǵyn qamtamasyz ete alamyz. Osy maqsatta oblysymyzda arnaıy ekonomıkalyq aımaqtardy damytý, ınvestorlarǵa jaǵdaı jasaý, jańa kásiporyndar ashý boıynsha naqty jumystar júrgizilýde. Biz ár salada belsendilik tanytyp, birlese áreket etýimiz kerek. Prezıdent tapsyrmalaryn sapaly júzege asyrý – bizdiń ortaq mindetimiz, – dedi Nuralhan Kósherov.
Túrkistan oblysynda ınvestorlarmen tikeleı ári kásibı jumys júrgizý maqsatynda jańa ınvestıtsııalyq basqarma qurylǵan. Bul qurylym ınvestorlarǵa tolyqqandy súıemeldeý qyzmetin usynyp, ákimshilik kedergilerdi azaıtý, jobalardy jedel iske asyrý, bıznes ortany jaqsartý baǵytynda júıeli jumys atqarady. Sondaı-aq arnaıy ekonomıkalyq aımaqtardyń jumysyn jańa formatta uıymdastyrý, áleýmettik-kásipkerlik korporatsııalardy damý ınstıtýtyna aınaldyrý máseleleri kún tártibine shyqty. Prezıdenttiń Joldaýynda da bul naqty aıtyldy.
Óńirde ındýstrıaldy aımaqtardy tıimdi paıdalaný, jergilikti shıkizatqa negizdelgen óndiristerdi iske qosý, tehnıkalyq mamandyqtarǵa suranysty arttyryp, kadrlyq áleýetti kóterý – basty nazarda. Oblys ákiminiń aıtýynsha, 2025–2028 jyldar aralyǵynda jalpy quny 2,5 trıllıon teńgeni quraıtyn 111 ınvestıtsııalyq joba júzege asyrylady. Bul jobalar nátıjesinde 23 766 jańa jumys orny ashylady. Atap aıtqanda, bıyldyń ózinde 57 joba iske asyrylyp, 8 163 jumys orny ashylmaq. Búginge deıin 124,1 mıllıard teńgeni quraıtyn 21 joba iske qosylyp, 3 457 adam turaqty jumysqa ornalasty. Bul – óńir ekonomıkasy úshin úlken serpilis.
Búginde Túrkistan oblysynda birqatar iri ınvestıtsııalyq jobalar júzege asyrylýda. Mysaly, Sozaq aýdanynda jylyna 1,6 mln tonna fosforıt kenin óńdeıtin «Sozaq Fosfat» zaýyty men jylyna 100 myń tonna kúkirt qyshqylyn shyǵaratyn «TAIQONYR QYSHQYL» zaýyty salynyp jatyr. Túlkibas aýdanynda jyldyq qýaty 1,8 mln tonnany quraıtyn kaýstıkalyq soda, tsement, PVH, ák jáne karbıd óndiretin «Sastóbe Innovatsııalyq kesheni» iske qosylmaq. Sonymen qatar, Túrkistan qalasynda maqta klasterin damytatyn «KAZAKHSTAN LIHUA», Shardara aýdanynda júgerini tereń óńdeıtin «Kazkrahmal» jáne Ordabasy aýdanynda jelatın men maı óndiretin «HUATING BIOTECHNOLOGY» zaýyttary boı kóterip keledi. Oblys ákimi óz sózinde bul jobalardyń óńirdiń ónerkásiptik áleýetin arttyryp qana qoımaı, shıkizattyq emes sektordaǵy Túrkistannyń úlesin eseleıtinin atap ótti.
Prezıdent Joldaýynda qozǵalǵan mańyzdy bastamalardyń biri – tsıfrlyq teńgeni engizý máselesi de keńinen talqylandy. Oblys ákimi bul bastamanyń elimizdiń qarjy júıesin jańa sapalyq deńgeıge kóteretinin atap ótti. Tsıfrlyq teńge – tranzaktsııalardyń ashyqtyǵy men qaýipsizdigin qamtamasyz etip, kóleńkeli ekonomıkamen kúresýdiń tıimdi tetigine aınalmaq. Osyǵan baılanysty oblystaǵy barlyq kásipkerler men qarjy ınstıtýttaryna tehnologııalyq jáne aqparattyq turǵyda daıyn bolý qajettigi aıtyldy. Oblys ákimdigi tarapynan tsıfrlyq teńgege kóshý úderisinde qajetti ádistemelik, uıymdastyrýshylyq jáne aqparattyq qoldaý kórsetiledi.
Budan bólek, jıynda Túrkistan qalasynda ashylǵan Woosong IT ýnıversıtetiniń mańyzdylyǵy da sóz boldy. 2 300 stýdentke arnalǵan oqý ordasy óńirdiń tsıfrlyq serpilisiniń negizi bolmaq. Ýnıversıtet jasandy ıntellekt, Big Data, kıberqaýipsizdik, baǵdarlamalaý, IT-ınjenerııa syndy baǵyttarda joǵary bilikti mamandar daıarlap, Qazaqstan men Ortalyq Azııadaǵy iri bilim habyna aınalady. Bıyl oblys ákimdigi tarapynan 100 memlekettik grant bólindi.
Kezdesý barysynda Túrkistan oblysy kásipkerler palatasynyń dırektory Asylan Ibadýllaev, «Nurym Group» JShS quryltaıshysy Syrym Ertaev jáne ózge de kásipkerler sóz sóılep, Prezıdent Joldaýyn iske asyrý jolynda memleketpen birlese eńbek etýge daıyn ekendikterin jetkizdi.
Jıyndy qorytyndylaǵan oblys ákimi Nuralhan Kósherov: «Árqaısymyz óz salamyzda belsendilik tanytyp, jaýapkershilikpen jumys isteýimiz qajet. Birlesken eńbegimizdiń nátıjesi el damýyna úles qosatynyna senemin», – dedi.