Nuralhan Kósherov: Túrkistanda áleýmettik-ekonomıkalyq ósim turaqty
TÚRKІSTAN. KAZINFORM — Qazaqstan Respýblıkasy Prezıdentiniń «Halyq únine qulaq asatyn memleket» tujyrymdamasyna sáıkes, Túrkistan oblysynyń ákimi Nuralhan Kósherov Túrkistan qalasynyń turǵyndarymen kezdesti. Kezdesý barysynda óńir basshysy ótken jyly atqarylǵan jumystarǵa jan-jaqty toqtalyp, oblystyń áleýmettik-ekonomıkalyq damý kórsetkishterin baıandady.
— Osy jyly da birinshi kezdesýimdi kıeli Túrkistan qalasynyń turǵyndary — ózderińizben ótkizgendi jón sanadym. Memleket basshysy Qasym-Jomart Kemeluly Toqaev 2026 jyldyń qańtar aıynda Qyzylorda qalasynda Ulttyq Quryltaıdyń besinshi otyrysynda elimizdiń keleshek damý baǵdary men qoǵamdaǵy ózekti máseleler týraly oılaryn ortaǵa saldy. Bul bastamalar memlekettik basqarýdy yqshamdap, onyń tıimdiligin arttyrýǵa, halyqtyń jaǵdaıyn odan ári kóterýge baǵyttalǵan. Memleket basshysynyń Jarlyǵyna sáıkes, oblys ákimderine barlyq aýdan, qalalardyń turǵyndarymen kezdesip, máselelerdi ashyq dıalog alańynda sheshý mindettelgen. Byltyrǵy kezdesýde Túrkistan qalasy boıynsha 17 másele kóterilgen. Olardyń 16-sy sheshimin taýyp, 1 máselesi bıyl sheshiledi. Sizder suraǵan sport keshenderdiń qurylysy aıaqtalyp, qoldanysqa berildi. Odan bólek 111 kóshege asfalt tóseldi. Osynyń barlyǵy sizderdiń qala turǵyny retinde belsendi ustanymdaryńyz ben jergilikti ákimdikpen birlese atqarǵan jumystardyń nátıjesinde júzege asty. Búgingi kezdesýde de belsendilik tanytyp, oılaryńyzda júrgen máselelerdi birge talqylap, sheshimin tabýǵa atsalysaıyq, — dep Nuralhan Kósherov memlekettiń qoldaýy men júıeli jumystyń nátıjesinde Túrkistan qalasynyń negizgi áleýmettik-ekonomıkalyq damý kórsetkishterinde oń ósim qalyptasqanyn atap ótti.
Jalpy óńirlik ónim kólemi 2025 jyly 526,3 mlrd teńgeni qurap, ótken jylǵy kezeńmen salystyrǵanda 15,5 paıyzǵa ósti. Ónerkásip ónim kólemi 2025 jyly 45,9 mlrd teńgege jetip, ótken jylǵy kezeńmen salystyrǵanda 10,3 paıyzǵa artqan. Shaharda jańa nysandar salynyp, týrıstik, óndiristik áleýet kóterilip keledi.
Halyqpen kezdesýde qala ákimi Ázimbek Pazylbekulynyń ótken jylǵy jumystar boıynsha baıandamasy tyńdaldy.
Odan keıin qala turǵyndary tarapynan kóterilgen ózekti máseleler tyńdalyp, usynys-pikirler qabyldandy. Árbir azamatqa óz pikirin erkin aıtýǵa, ótinish-tilekterin jetkizýge tolyq múmkindik berildi. Turǵyndar jerdi zańdastyrý, baspanamen qamtý, ınfraqurylym, qoǵamdyq kólik, turǵyn úılerdegi kemshilikter, áleýmettik qoldaý, turǵyn úı-kommýnaldyq sharýashylyq, jol sapasy, bilim, týrızmdi damytý, áleýmettik nysandar qurylysy jáne ózge de máselelerdi qozǵady.
Oblys ákimi Nuralhan Kósherov árbir suraqqa naqty jaýap berip, jaýapty basqarma basshylary men tıisti mekeme jetekshilerine tapsyrmalar júktedi. Kóterilgen máselelerdiń kezeń-kezeńimen sheshilýi baqylaýǵa alynatynyn jetkizdi.
Kezdesýge qatysqan turǵyndar óńirdegi, qaladaǵy ilkimdi ister men bastamalarǵa oń baǵalaryn berip, kóterilgen máseleler sheshimin tabatynyna senimin bildirdi.
Aıta keteıik, Túrkistan oblysynda óndiris oryndaryn ashý, ınvestıtsııa tartýǵa basymdyq berilgen. Óńir ekonomıkasyna 1,7 trln teńge ınvestıtsııa tartylyp, ósim 121,6 paıyzdy qurady. Onyń ishinde 1,1 trln teńgesi — jeke ınvestıtsııa. Ekonomıkany ártaraptandyrý maqsatynda ótken jyly 340 mlrd teńgege 58 ınvestıtsııalyq joba iske qosylyp, 8 myńnan astam jumys orny ashyldy. Onyń ishinde maqta óńdeý, alıýmınıı buıymdary, turǵyn úılerge arnalǵan gaz qazandyqtary jáne sýsyn shyǵaratyn zaýyttar, ýran jáne ák óńdeý keshenderi ashyldy. Memlekettik bıýdjetke salyq túsimi aldyńǵy jylmen salystyrǵanda 234 mlrd.teńgege ósip, alǵash ret 1 trln teńgege jetti.