Nuralhan Kósherov: Referendým — el bolashaǵyn aıqyndaıtyn asa mańyzdy tarıhı qadam
TÚRKІSTAN. KAZINFORM — Túrkistan oblysynyń ákimi Nuralhan Kósherov turǵyndardy 15 naýryzda ótetin jańa Konstıtýtsııaǵa arnalǵan respýblıkalyq referendýmǵa qatysýǵa shaqyrdy.
Onyń sózinshe, túrkistandyqtar árqashan birligimen, eldigimen daralanǵan.
— Búgin biz taǵy bir tarıhı belestiń aldynda turmyz. Ózderińizge belgili, Memleket basshysy — Qasym-Jomart Kemeluly Toqaevtyń Jarlyǵyna sáıkes, 15 naýryz kúni elimizde jańa Konstıtýtsııaǵa arnalǵan respýblıkalyq referendým ótedi. Bul — Táýelsiz Qazaqstannyń bolashaǵyn aıqyndaıtyn asa mańyzdy tarıhı qadam, — dedi ákim.
Nuralhan Kósherov atap ótkendeı, Memleket basshysy usynǵan konstıtýtsııalyq reformalar — elimizdiń saıası júıesin jańǵyrtýǵa, azamattardyń quqyqtary men bostandyqtaryn nyǵaıtýǵa, qoǵam men memleket arasyndaǵy ózara senimdi arttyrýǵa baǵyttalǵan.
— Bul — «Halyq únine qulaq asatyn memleket» qaǵıdatynyń naqty júzege asýy. Jańa Konstıtýtsııalyq model arqyly biz Ádiletti Qazaqstandy qurýdyń berik negizin qalaımyz, — dedi óńir basshysy.
Nuralhan Kósherov bul qujattyń basty erekshelikterine toqtaldy:
Birinshiden, adam qundylyǵy bárinen joǵary qoıylady. Budan bylaı «memleket adam úshin» jumys isteıdi. Ár azamattyń quqyǵy men qadir-qasıeti bárinen bıik turady.
Ekinshiden, áleýmettik jaýapkershilik kúsheıedi. Memlekettiń halyq aldyndaǵy mindetteri keńeıip, qoǵamdaǵy teńsizdikti azaıtýǵa baǵyttalǵan naqty tetikter bekitiledi.
Úshinshiden, bilim, ǵylym jáne ınnovatsııa balalarymyzdyń sapaly bilim alyp, ǵylym jolynda erkin qanat qaǵýyna jol ashady.
Tórtinshiden, tártip pen ádildik qaǵıdaty, ıaǵnı zań ústemdigi men tabıǵatqa uqypty qaraý alǵash ret konstıtýtsııalyq deńgeıde bekitiledi.
Oblys ákimi Túrkistan — qazaq rýhanııatynyń qara shańyraǵy, memlekettigimizdiń altyn besigi ekenin atap ótti. Aıtýynsha, kezinde Táýke han ataqty «Jeti jarǵyny» dál osy kıeli mekende qabyldap, el ishinde ádildikti ornatqan edi. Búgingi konstıtýtsııalyq reformalar — sol babalar amanatynyń zamanaýı jalǵasy.
— Qazir Túrkistan oblysy kóz aldymyzda túlep, túrlenip keledi. Jańa joldar salynyp, kásiporyndar ashylýda. Aýyl sharýashylyǵy men týrızm jańa deńgeıge kóterilip keledi. Shaharymyz túrki áleminiń maqtanyshyna aınaldy. Osy oń ózgeristerdiń bári — bizdiń birligimiz ben turaqtylyǵymyzdyń jemisi, — dedi Kósherov.
Túrkistan oblysynyń ákimi turǵyndardy referendýmǵa qatysýǵa shaqyrdy.
— Ádiletti Konstıtýtsııa — myqty memlekettiń kepili. 15 naýryz kúni referendýmǵa kelip, óz tańdaýyńyzdy jasaýǵa shaqyramyn. Bul — sizdiń, balalaryńyz ben nemerelerińizdiń jarqyn bolashaǵy úshin jasalǵan mańyzdy qadam. Birligimiz bekem, bolashaǵymyz jarqyn, elimiz aman, jurtymyz tynysh bolsyn! — dep túıindedi ol.
