Nura toptyq sý qubyrynyń apatty ýchaskesi: 68,7 shaqyrym bóliktiń qurylysy aıaqtaldy
ASTANA. KAZINFORM - Aqmola oblysynda Nura toptyq sý qubyrynyń apatty ýchaskesiniń qurylysy aıaqtaldy, dep habarlaıdy QR Sý resýrstary jáne ırrıgatsııa mınıstrliginiń baspasóz qyzmeti.
Aqmola oblysynda qaıta jańartylyp jatqan Nura toptyq sý qubyrynyń 68,7 shaqyrym bóliginiń qurylysy aıaqtaldy.
Qazirgi ýaqytta jergilikti atqarýshy organdardyń ótinishi boıynsha Uzynkól, Býrevestnık, Poltavskoe jáne Egindikól aýyldaryn jańa sý torabyna qosý jumysy júrgizilýde. Jaqyn arada bul jumystar aıaqtalady. Osyǵan deıin toptyq sý qubyryna Janteke jáne Toǵanas aýyldary qosylǵan bolatyn.
Odan keıin sý qubyrynyń Uzynkól aýylynan Egindikól aýylyna deıingi bóligin aıaqtap, qoldanysqa berý josparlanyp otyr. Esterińizge sala keteıik, osyǵan deıin Nura toptyq sý qubyrynyń bas qurylystarynan uzyndyǵy 36 shaqyrym bolatyn Uzynkól aýylyna deıingi ýchaskede sý berile bastady.
«Jobalaý-smetalyq qujattamaǵa saı sý qubyrynyń negizgi bóligin tóseý jumystary aıaqtaldy. Nura toptyq sý qubyryn rekonstrýktsııalaý erekshe baqylaýda. Sý sharýashylyǵy komıtetiniń mamandary únemi qurylys alańyna baryp, jumystardyń oryndalýyn qadaǵalaıdy. Bıyl 1,4 mln turǵyndy aýyz sýmen qamtý sapasyn jaqsartý úshin toptyq sý qubyrlaryn salý jáne rekonstrýktsııalaý boıynsha 30 joba iske asyrylyp jatyr», – dedi Sý resýrstary jáne ırrıgatsııa mınıstrligi Sý sharýashylyǵy komıtetiniń tóraǵasy Arsen Jaqanbaev.
