Nura ózeninde jańa kópir ashyldy: Temirtaýǵa jol 3 esege qysqardy
ASTANA. KAZINFORM — Qaraǵandy oblysynda kóp jyldan beri sheshimin kútken másele sheshimin tapty: Buqar jyraý aýdanyna qarasty Ǵabıden Mustafın aýylynda Nura ózeni arqyly ótetin jańa kópir paıdalanýǵa berildi, dep habarlaıdy oblys ákimdigi.
Vedomstvo atap ótkendeı, endi Temirtaýǵa deıingi jol úsh esege qysqardy — buryn turǵyndar 40 shaqyrym aınalyp ótse, qazir bar bolǵany 12 shaqyrym ǵana. Bul jol burynǵydan jyldamyraq, qolaıly ári qaýipsiz boldy.
Ashylý rásimine aýyl turǵyndary men jergilikti qoǵam belsendileri qatysty.
— 2015 jylǵy sý tasqynynan keıin aýylymyzda jańa kópir salý máselesi ótkir turdy. Biz bul qajettilikti dáleldep, túrli mekemelerge júgindik. Búgin, mine, kópten kútken qýanyshty kún týdy. Qurylystyń basynan aıaǵyna deıin kýá boldyq. Bul kópir — bizdiń ómir jolymyz ispetti. Buryn Temirtaýǵa barý kóp ýaqyt alatyn, endi jol áldeqaıda jeńildedi, — deıdi aýyl turǵyny Tatıana Zagýrnaıa.
Kópirdiń qurylysy úsh jylǵa sozyldy. Uzyndyǵy 150 metr bolatyn nysan tolyqtaı asfalttalyp, zamanaýı standarttarǵa saı salyndy. Buryn paıdalanylyp kelgen jaıaý júrginshiler kópiri aldaǵy ýaqytta buzylatyn bolady.
— Endi Temirtaýǵa deıingi jol úsh esege qysqardy. Bul — turǵyndar úshin áldeqaıda jyldam, yńǵaıly ári eń bastysy, qaýipsiz qatynaý múmkindigi, — dedi oblys ákimi Ermaǵanbet Bólekpaev jańa nysannyń ashylýynda. — Jobany júzege asyrýǵa atsalysqan qurylysshylarǵa, ınjenerlerge jáne baqylaý qyzmetterine alǵysymdy bildiremin. Sondaı-aq, osy kezeńde túsinistik tanytqan aýyl turǵyndaryna rızashylyǵymdy aıtamyn.
Jańa kópirdiń iske qosylýymen aýylǵa qoǵamdyq kólik qatynaı bastaıdy. Bul jergilikti turǵyndardyń qalaǵa qatynaýyn edáýir jeńildetedi.
Budan buryn Qaraǵandyda tehnogendi sıpattaǵy tótenshe jaǵdaı jarııalanǵany anyqtaldy.