Nura ózeninde jarylys jumystary júrgizildi - Qaraǵandy oblysy
ASTANA. QazAqparat - Qaraǵandy oblysynda kóktemgi sý tasqyny bastalǵaly úsh eldi mekende 12 turǵyn úıdi sý basýdyń aldy alyndy jáne avtomobıl joldarynyń tórt bóliginde sý júrý joıyldy, dep habarlaıdy óńir basshysynyń resmı saıty.
Muz keptelisterin boldyrmaý úshin Nura ózeninde jarylys jumystary júrgizildi. Ol jaıly apparattyq jınalys barysynda oblys ákiminiń orynbasary Anatolıı Shkarýpa málimdedi.
- Jaýyn-shashyn kóp jaýǵanǵa jáne qar erigenge baılanysty naýryzdyń 21-nen 24-ne deıingi aralyqta oblysymyzda erigen sý úsh eldi mekendegi 12 turǵyn úıge kirgen: Temirtaýda, Abaıda jáne Buqar Jyraý aýdanynyń Kókpekti kentinde. Barlyq úılerden sý soryp shyǵaryldy, úıler buzylǵan joq. Ýaqytynda úsh adam evakýatsııalanyp, biraz ýaqyt týystarynyń úıinde boldy, qazirgi tańda olar óz úılerine oraldy, - dep atap ótti oblys ákiminiń orynbasary kóktemgi sý tasqynyna qatysty esep berý barysynda.
Qarqaraly jáne Buqar Jyraý aýdandarynda avtomobıl joldarynyń tórt bóliginde sý júrdi. Olardyń ekeýinde qazirgi ýaqytta qozǵalys qaıta qalpyna keltirildi. Qarqaraly aýdanyndaǵy «Yntaly-Besoba» jáne «Taldy-Aqbaı-Qyzylbaı» avtojoldarynyń bólikterinde joldyń betki qabatyn sý shaıyp ketkendikten qozǵalys shektelgen. Onda qazir jumystar júrgizilip jatyr.
- Muz keptelisteriniń aldyn alý maqsatynda Nura ózeninde jarylys jumystary júrgizildi: Ǵ. Mustafın kenti men Buqar Jyraý aýdanyndaǵy Petrovka aýyldarynyń mańyndaǵy avtomobıl kópirlerinde. 44 kg jarylǵysh zat paıdalanyldy, - dep habarlady Anatolıı Shkarýpa.
26 naýryzda Tokarevka kentiniń janyndaǵy jaıaý júrginshiler kópiriniń mańaıynda jarylys jumystaryn ótkizý josparlanǵan.
Jalpy oblysymyzdaǵy kóktemgi sý tasqynyna qatysty jaǵdaı turaqty. Samarqand sý qoımasynda 26 naýryzdan bastap sý jiberý kólemin sekýndyna 120 tekshe metrge deıin ulǵaıtqan.
Oblys ákimi aldyn alý sharalaryn kúsheıtýdi tapsyrdy. Sý júrýi múmkin degen barlyq avtojoldardyń bólikterin aralap shyǵý kerek. Qajet bolǵan jaǵdaıda qosymsha sý ótkizý qubyrlary ornatylýy tıis.
- Úılerge sý ketýge jol bermeńizder. Bizge tótenshe jaǵdaıdy joıý úshin qyrýar kúsh jumsaýdyń keregi joq. Olardyń aldyn alýymyz qajet. Sý júretin jerleri tar bólikterde adamdar men tehnıkany kóbirek jumyldyryńyzdar, - dep talap etti Erlan Qoshanov. - Kóktemgi sý tasqynyna qatysty jaǵdaı - búgingi kúnniń negizgi máselesi. Sý endi ǵana erı bastady».
