Nura ózeni basseıninde ylǵal qorynyń ortasha kólemi 12% artty

NUR-SULTAN. QazAqparat – Qaraǵandy oblysynyń ákimi Jeńis Qasymbek óziniń Facebook paraqshasynda óńirdegi sý tasqynyna baılanysty jaǵdaıdy jáne sý tasýynyń aldyn alý jumystary týraly jazdy, dep habarlaıdy QazAqparat.

Oblys ákiminiń aıtýynsha, búgingi kúni sý tasqynynyń aldyn alý kún tártibindegi ózekti másele. Osy ýaqytta Qarqaraly, Abaı, Buqar jyraý jáne Nura aýdandarynyń 158 sý tasqyny qaýipi bar eldi-mekenderi baqylaýǵa alyndy. Naýryz aıynyń sońynda jaýǵan mol jaýyn-shashyn men kelesi aptadan bastap boljanyp otyrǵan jyly aýa raıy jaǵdaıdy kúrdelilendirip otyr.

Nura ózeniniń basseıninde ylǵal qorynyń ortasha kóleminiń 12% - ǵa artqany baıqalady. Sherýbaı-Nura ózenindegi ylǵal qory 54 mln m³ artty, alaıda bul kórsetkish ortasha kópjyldyq mánnen 54% tómen. Keńgirde qar qory 22 mln m³ azaıdy.

Kosmomonıtorıngtiń derekteri boıynsha, oblystyń soltústik aýmaǵynyń 45% - da qar jatyr. Al ońtústik óńirlerde qar joq.

«TJD bastyǵy Murat Qatpanovpen birge Qarqaraly jáne Shet aýdandarynyń aýmaǵyndaǵy Nura, Sherýbaı-Nura jáne Jarly ózenderiniń arnalaryn araladyq.

Qarqaraly aýdanynda sý tasqyny qaýipi bar jerlerde, ózen arnalary boıynda Jarly, Tegisshildik jáne Kóktas eldi-mekenderi ornalasqan. Jeti jyl buryn Tegisshildik aýyly sý astynda qalǵan bolatyn. Jaǵdaıdyń qaıtalanýyn boldyrmaý úshin jyl saıyn munda topyra úıip, Jarly ózeniniń arnasy boıynsha jarylys jumystary júrgizildi.

Shet aýdanynyń aýmaǵyn tekserý Sherýbaı-Nura ózeniniń bastaýlaryn qaraýdan bastaldy. Qyzylqoı aýylyna erekshe kóńil bólindi. Búgingi tańda aýyl aınalasyndaǵy úıilgen topyraqtyń bıiktigi bir metr, al keıbir jerlerde onyń bıiktigi bir jarym metrden asady»,-deıdi ákim.

Onyń jazýynsha, 11 naýryzdan bastap oblysta Nura ózeninde toǵyz jarylys jumystary júrgizildi. Joldardaǵy sý ótkizý qurylystarynyń 85% - ǵa jýyǵy, 33,9 km arnalar, 162 km aryqtar tazartylyp, 12 km sý burý orlary ázirlendi.

Oblystyq sý tasqynyna qarsy shtab jumys isteýde. Onyń quramynda jeke quramnan 313 adam, 184 birlik tehnıka, onyń ishinde 134 motopompa jáne 31 birlik júzý quraldary kiretin alty mobıldi top bar.

Sý tasqynynyń saldaryn barynsha azaıtý qajet, ol úshin sý basýǵa beıim eldi- mekenderdiń árbir turǵyny óz aýlasyn retke keltirip, olardy qardan tazalap, sýdy buryp, aryqtardy tazartýy tıis.

Osyǵan deıin demalys kúnderi elimizde kúnniń 25 gradýsqa deıin jylıtynyn habarlaǵan bolatynbyz.