Nura ózeni Aral teńiziniń taǵdyryn qaıtalamaýy tıis - depýtat D. Qusaıynov
ASTANA. Qarashanyń 4-i. QazAqparat /Qanat Mámetqazyuly/ - Ortalyq Qazaqstandaǵy Nura ózeni Aral teńiziniń taǵdyryn qaıtalamaýy tıis.
Búgin QR Parlamenti Májilisiniń jalpy otyrysynda Úkimet basshysynyń atyna saýal joldaǵan depýtat Daýylbaı Qusaıynov Nura ózeniniń jaǵdaıyna arasha túsý qajettigin atap ótti, dep habarlaıdy QazAqparat.
«Ortalyq Qazaqstannyń qorshaǵan ortasy - ónerkásiptiń jetilip, ekologııamen sanaspaǵandyqtan asa qolaıly emes dep tanylyp otyr. Bulaısha qorshaǵan ortanyń jaǵymsyz ózgerýi aýrýǵa shaldyqqandar men adam ólimi sanynyń ósýine ákeletini anyq. Bul aımaqtyń úlken kúretamyry Nura ózeni bolsa, bul ózen arnasynda sońǵy jyldary sý azaıyp, synap paıda bola bastaǵany málim. Shyndyǵyn aıtqanda burynǵy Nura joǵalyp, adam jaıdaq keship óte beretin jaǵdaıǵa jetti. Tipti ózennen nár alatyn shabyndyq ta, jaıylym da azaıyp, onyń baılyǵy - balyǵy da quryp barady. Kezinde bul ózenniń sýyn aýyzsý retinde paıdalanýshy edi. Qazir olaı emes. Nuranyń arnasyn tazartý týraly Úkimet baǵdarlamasy da tıimsizdigin kórsetti», dedi depýtat Daýylbaı Qusaıynov.
Onyń aıtýynsha, búgingi kúni Nura ózeni álemge áıgili Qorǵaljyn qoryǵyna da qaýip tóndire bastaǵan. Elbasy N. Nazarbaev osy qoryqty búgingi qalpynda saqtap, tabıǵı baılyǵyna nuqsan keltirmeı keleshek urpaqqa jetkizý paryzyn basa aıtqan bolatyn.
«Nura ózeni Aral teńiziniń taǵdyryn qaıtalamaýy tıis. Al onyń aldyn alý úshin tıisti sharalar qabyldamasaq, kún ótken saıyn bul maqsatqa arnaıtyn shyǵyn da molaıa túsetini daýsyz», dedi depýtat.
