Nura-Esil kanalynda taǵy bir bala sýǵa aǵyp ketti
ASTANA. QazAqparat - Nura-Esil kanalynda taǵy bir bala sýǵa aǵyp ketti, dep habaraıdy QazAqparat tilshisi QR ІІM TJK baspasóz qyzmetine silteme jasap.
«19 shildede saǵat 05:57-de Esil aýdany, «Prıgorodnyı» turǵyn úı alabynda, Nura-Esil kanalynda Ortalyq óńirlik aeromobıldik jedel-qutqarý jasaǵynyń qutqarýshylary sýdan 2004 jyly týǵan balanyń denesin tapty. Ol 18 shildede shomylýǵa tyıym salynǵan jerde sýǵa túsip, aǵyp ketken», - dep habarlady komıtettiń baspasóz qyzmeti.
Eske salaıyq, 25 maýsymda Nura-Esil kanalynda birden tórt bala sýǵa batyp ketken bolatyn. Qaza tapqan balalardyń jasy 9, 12, ekeýi - 11 jasta bolǵan. TJK deregi boıynsha, balalardyń bári ártúrli otbasylardan. Vedomstvo málim etkendeı, 24 maýsymda olar shomylýǵa tyıym salynǵan jerde sýǵa túsip, aǵyp ketken. Olar ata-analarynyń qaraýynsyz qalǵan.
Sondaı-aq, buǵan deıin kilem jýyp jatqan áıel men eki qyzynyń sýǵa aǵyp ketkeni habarlanǵan edi.
