Nura aýdanynyń turǵyny memlekettik grantqa kóbik blok óndiretin tseh ashty

QARAǴANDY. QazAqparat – Qaraǵandy oblysy Nura aýdany Qaroı aýylynyń turǵyny óz isin ashýǵa memlekettik grant alyp, kóbik bloktaryn óndirýmen aınalysýda, dep habarlaıdy QazAqparat Qaraǵandy oblysy ákimdiginiń baspasóz qyzmetine silteme jasap.

Talǵat Júkenov eki ulyn jalǵyz tárbıelep otyr. Ol 48 jasta. Er adam mamandyǵy boıynsha qurylysshy. Ótken jyly «Bastaý Bıznes» baǵdarlamasy boıynsha kásipkerlik negizderin oqyp, 2021–2025 jyldarǵa arnalǵan kásipkerlikti damytýdyń ulttyq jobasy boıynsha memlekettik granttar konkýrsyna qatysýǵa sheshim qabyldaǵan.

– Bıznes-jospar jazdym, ony qorǵadym jáne 1 mıllıon 600 myń teńge kóleminde grant aldym. Bul qarajatqa qajetti qural-jabdyqtar men nysandar satyp alyndy, – deıdi Talǵat Júkenov.

– Jaqynda úıimniń janynda tseh ashtym. Men ózim jumys istep jatyrmyn, uldarym da kómektesedi. Óteýsiz granttar óz bıznesin bastaǵysy keletinder úshin jaqsy múmkindik dep aıtqym keledi.

Tsehtyń aýdany shamamen 10 sharshy metrdi quraıdy. Іsin jańadan bastaǵan kásipker san emes, sapa úshin jumys isteıtinin aıtady. Óndiriletin kóbik bloktarynyń kólemi tapsyrystarǵa baılanysty, - deıdi Talǵat.

Bolashaqta ol óz sheberhanasyn keńeıtýge nıetti.

Nura aýdanynda bıyl barlyǵy 10 grant berildi. Halyqtyń áleýmettik osal toptarynan taǵy segiz kásipkerdi qarjylandyrý josparlanýda.