«Nur joly» ótkizý beketinde Qytaıdan Qazaqstanǵa jetkiziletin júkti tıeý máselesi sheshildi –Úkimet
NUR-SULTAN. QazAqparat - Búgin Premer-Mınıstr Álıhan Smaıylovtyń tóraǵalyǵymen ótken Daǵdarysqa qarsy sharalar jónindegi jedel shtabtyń kezekti otyrysynda keden salasyndaǵy máseleler qaraldy.
Bul týraly QazAqparat Úkimettiń resmı saıtyna silteme jasap habarlaıdy.
Kedendik-logıstıkalyq ınfraqurylymdy damytý boıynsha qabyldanyp jatqan sharalar týraly QR Qarjy birinshi vıtse-mınıstri M. Sultanǵazıev baıandady.
Qarjy mınıstrliginiń Memlekettik kirister komıtetiniń aqparatyna sáıkes, búgingi tańda QHR-men shekaradaǵy «Altynkól» jáne «Dostyq – Temirjol» temirjol ótkizý pýnktteri shtattyq rejımde jumys istep tur.
«Qazirgi tańda 5 avtojol ótkizý pýnktiniń 4-ýi ashyq jáne júkterdi qabyldap jatyr. «Qaljat» ótkizý pýnkti búginde epıdemıologııalyq ahýalǵa baılanysty QHR jaǵynan jabyq tur. Taraptar Qaljat-Dýlaty qyzmetin qaıta bastaıtyn naqty kúnderdi kelisip jatyr», — dedi QR qarjy birinshi vıtse-mınıstri.
Úkimet QHR-dan QR-ǵa «Nur joly» ótkizý pýnktinde júkterdi aýystyryp tıeý máselesin sheshti, al elektrondyq kezek retke keltirilip jatyr. Bul oraıda júk tasý qyzmetiniń aqysy 2 ese tómendeıdi.
Keńes barysynda QR Premer-Mınıstri qazirgi jaǵdaıǵa baılanysty týyndap jatqan jáne bolýy yqtımal syn-tegeýrinderge jedel den qoıý qajettigin atap ótti. Daǵdarysqa qarsy sharalar jónindegi jedel shtabtyń kelesi otyrysy 9 naýryzda ótedi.
