«Nur Joly» keden beketiniń basshysy men orynbasary ustaldy

NUR-SULTAN. QazAqparat - Qytaımen shekaradaǵy «Nur Joly» keden beketinde laýazymdy tulǵalardyń qylmystyq áreketi áshkerelendi, dep habarlaıdy QazAqparat.

Bul týraly Sybaılas jemqorlyqqa qarsy is-qımyl agenttiginiń Telegram kanalynda jarııalandy.

Keden beketindegi qylmystyq áreketti Almaty oblysy boıynsha Sybaılas jemqorlyqqa qarsy qyzmet Bas prokýratýranyń ishki tergeý departamentimen birlese anyqtady.

Jedel júrgizilgen aıla-shara jelisi boıynsha qadaǵalaý organynyń qyzmetkeri «máselelerdi oń sheshkeni» úshin 50 myń AQSh dollary mólsherinde para bergen. Para berý faktisi qujat túrinde rásimdelip, nátıjesinde «Nur Joly» keden beketiniń basshysy men onyń orynbasary ustaldy.

Sonymen qatar, tekserýshilerge iri kólemdegi taýar kontrabandasyn jasyrǵany úshin 30 myń AQSh dollary mólsherinde para bergen ýákiletti ekonomıkalyq operatorlardyń biriniń ókili de ustaldy.

Sotqa deıingi tergeý júrip jatyr. Sol sebepti, ózge aqparat jarııa etýge jatpaıdy.

Eske sala keteıik, Memleket basshysynyń tapsyrmasymen bıylǵy qańtardan bastap keden beketterinde ýákiletti ekonomıkalyq operatorlardyń qyzmetine tekserý júrgiziletini belgili. Tekserýlerge Bas prokýratýra qyzmetkerleri jetekshilik etedi.