«Nur joly» pýnkti mańynda 1500 júk kóligi jınaldy — komıtet jaǵdaıdy túsindirdi

ASTANA. KAZINFORM — Memlekettik kirister komıteti «Nur joly» ótkizý pýnkti aldynda shamamen 1500 júk kóligi ýaqytsha jınalǵany týraly habarlady.

Vedomstvo málimetinshe, 2025 jylǵy 22 qazanda Úrimji qalasynda ótken Qazaqstan Respýblıkasy men Qytaı Halyq Respýblıkasynyń shekara mańy keden organdary basshylarynyń kezdesýi barysynda qytaı tarapy táýligine keminde 800 avtokólik quralyn qabyldaýǵa, sondaı-aq aǵymdaǵy jyldyń sońyna deıin bul kórsetkishti kezeń-kezeńimen táýligine 1000-ge deıin ulǵaıtýǵa kelisimin bildirdi. Osy kelisimderge sáıkes tasymaldaý úderisiniń úzdiksizdigin qamtamasyz etý úshin Elektrondyq kezek júıesindegi (EKJ) lımıtter ulǵaıtylǵan bolatyn.

— Alaıda, 2025 jylǵy 8–12 qarasha aralyǵynda qytaı tarapy naqty qabyldaǵan avtokólikter sany táýligine orta eseppen 700–750-di quraǵan, bul qazaqstandyq taraptaǵy avtokólik quraldarynyń ýaqytsha jınalýyna negizgi sebep boldy. Sonymen qatar, «Qaljat» — «Dýlaty» (QHR) irgeles ótkizý pýnktinde shamamen bir apta boıy ınspektsııalyq-tekserý kesheniniń montajdaý jumystary júrgizildi. Atalǵan kezeńde bul baǵyttyń ótkizý qabileti shekteýli bolyp, kólikter aǵynynyń bir bóligi «Nur joly» pýnktine qaıta baǵyttaldy. Bul ınfraqurylymǵa qosymsha júkteme túsirdi. Jaǵdaıdy turaqtandyrý maqsatynda 2025 jylǵy 13 qarashadan bastap EKJ avtokólik jiberý lımıti táýligine 650 kóleminde ońtaılandyrylatyn bolady. Bul aǵyndy birkelki bólýge jáne ótkizý operatsııalarynyń turaqty júrgizilýin qamtamasyz etýge múmkindik beredi. Bul jaǵdaı Memlekettik kirister komıtetiniń turaqty baqylaýynda, — delingen komıtet taratqan aqparatta.

Memlekettik kirister komıteti atap ótkendeı, Qytaı tarapynyń ótkizý qabiletin arttyrý boıynsha kelissózder belsendi júrgizilip jatyr, ózara túsinistikke qol jetkizildi.

Osydan buryn Aýyl sharýashylyǵy mınıstri Aıdarbek Saparov Úkimet otyrysynan keıin ótip jatqan baspasóz máslıhatynda Qytaı shekarasynda qańtarylyp turǵan qazaqstandyq vagondar týraly túsinikteme berdi.