«Nur Joly» men «Qorǵasta» kólikterdi kedendik rásimdeý bir táýlikke deıin qysqarady — qytaılyq ınvestor
ASTANA. KAZINFORM – Beijing Polyking New Horizons Technology Industry Co. bas dırektory Lı Kanchao «Nur Joly» men «Qorǵas» ótkizý beketterinde kólikterdi kedendik rásimdeý merzimin qazirgi 20-30 kúnnen bir táýlikke deıin qysqartatyn jańa júıe engiziletinin aıtty. Bul týraly ol «Qazaqstan – Qytaı» ınvestıtsııalyq forýmy aıasynda Jibek Joly telearnasyna bergen suhbatynda málimdedi.
— «Nur Joly» men «Qorǵas» ótkizý beketterine arnalǵan jańa júıe jobasy týraly tolyǵyraq aıtyp berseńiz. Ol qalaı jumys isteıdi jáne jobaǵa qansha ınvestıtsııa salý josparlanǵan?
— Bul joba «Nur Joly» men «Qorǵas» beketterindegi kólik keptelisin azaıtýǵa baǵyttalǵan. Qazir bul eki beketten ótýge 20-30 kún ýaqyt ketedi. Jańa júıe men ázirlengen marshrýttyń arqasynda kólikterdi kedendik rásimdeý ýaqytyn bir táýlikke deıin qysqartamyz. 30 kúnnen bir táýlikke deıin qysqartý – bizdiń basty jetistigimiz.
Joba Qazaqstan men Qytaı úkimetteriniń qoldaýymen ázirlendi. Qytaı keden qyzmetiniń derekterdi óńdeý ortalyǵy aqparattyq qaýipsizdikti qamtamasyz etýge kómektesti. Bul – eki eldiń keden júıelerin biriktirip, shekaradaǵy keptelisti azaıtatyn, Qazaqstan men Qytaı arasyndaǵy saýdany damytýǵa jáne avtokólik saýdasyn jeńildetýge múmkindik beretin ınnovatsııalyq sheshim.
— Jobanyń negizgi mindetteriniń biri Qazaqstan men Qytaı arasyndaǵy logıstıkany jedeldetý dep túsinýge bola ma?
— Dál solaı. Logıstıka qalypty jumys istep tur. Alaıda kedendik rásimdeý birqatar sebepke baılanysty uzaqqa sozyldy. Eki tarapta ártúrli júıeler, derekter bazasy, esepteý tártibi men jumys kestesi qoldanyldy. Endi osy júıelerdi tikeleı baılanystyryp, kedendik rásimdeýdi barynsha jeńildetemiz.
— Jobany júzege asyrýǵa qansha qarajat ınvestıtsııalaý josparlanyp otyr?
— Jańa júıeni iske qosýǵa bastapqyda 10 mln AQSh dollary kóleminde ınvestıtsııa salynady. Aldaǵy ýaqytta qoıma keshenderin salýǵa jáne jańa avtojol tartýǵa taǵy 200 mln dollar baǵyttaýdy josparlap otyrmyz. Alǵashqy kezeńde bıyl Qazaqstan men Qytaı arasyndaǵy avtokólik saýdasyn 30 paıyzǵa arttyrýdy kózdeımiz. Al jańa qoımalar men jol ınfraqurylym iske qosylǵannan keıin bul kórsetkishti eki ese ulǵaıtýdy josparlap otyrmyz.
— Sizder Jetisý oblysynda ındýstrııalyq park jobasyn da júzege asyryp jatyrsyzdar. Bul jobaǵa qandaı kásiporyndar tartylmaq?
— Iá, biz Jetisý oblysymen birlesip jumys istep jatyrmyz. Jańa ındýstrııalyq parkke jańartylǵan logıstıka men tsıfrlyq júıemizdiń negizinde joǵary tehnologııalyq kompanııalardy tartamyz. Olardyń qatarynda avtokomponent óndirýshileri, qurastyrý kásiporyndary, sondaı-aq drondar men robot tehnıkasyn ázirleıtin kompanııalar bar. Parkke keletin kásiporyndarǵa damyǵan logıstıkalyq ınfraqurylym, sapaly qyzmet kórsetý jáne logıstıkalyq jelimiz arqyly qarjylaı qoldaý alý múmkindigi usynylady.
Eske sala keteıik, búgin Almatyda Memleket basshysy Qasym-Jomart Toqaevtyń qatysýymen «Qazaqstan – Qytaı» ınvestıtsııalyq forýmy ótip jatyr. Forým barysynda Prezıdent eki eldiń taýar aınalymyn 100 mlrd dollarǵa deıin arttyrýdy josparlap otyrǵanyn málimdedi.
