Nur-Sultannyń jańa kóshelerine ólkedegi kóne tarıhı ataýlar beriledi

NUR-SULTAN. QazAqparat – Nur-Sultan qalasy tilderdi damytý jáne arhıv isi basqarmasynyń basshysy Sáken Esirkep shahardyń jańa kóshelerine ólkedegi kóne tarıhı ataýlardy berý josparlanyp otyrǵanyn aıtty, dep habarlaıdy QazAqparat tilshisi.

«Elordamyzdyń onomastıkasyna qatysty jańa zertteýler júrgizip, kitap shyǵarýdy oılap otyrmyz. ıAǵnı, qala kóshelerine ataý bergen kezde osy elordamyzdyń baıyrǵy, tarıhı attaryn jańǵyrtsaq degen oı bar. Buryndary Aqmolanyń kezinde, oǵan deıin de qoldanysta bolǵan ár túrli tarıhı nysandardyń, eldi mekenderdiń, jerlerdiń, qalashyqtardyń attary bolǵan. Sonyń bárin aldaǵy ýaqytta qala kóshelerine at bergen kezde negizge alý úshin osyndaı zertteý jumysyn josparladyq. Ólketanýshy ǵalymdarmen aqyldasyp jatyrmyz. Buǵan 9 mln teńge surap otyrmyz», - dedi basqarma basshysy qalalyq máslıhatta ótken bıýdjetti naqtylaý sharasynda.

Sondaı-aq, ol máslıhat depýtattaryna «Qara shańyraq» deıtin jobany tanystyrdy.

«Bul jobaǵa 15 mln teńge 100 myń teńge qosymsha qarajat suralyp otyr. Bul joba aıasynda jyl sońyna deıin balabaqshalardan bastap mektepterde ata-analarmen kezdesýler serııasyn ótkizsek dep otyrmyz. Kem degende150 kezdesý bolady. Sonymen qatar, tildik ahýaldy jaqsartýǵa arnalǵan áleýmettik rolıkter serııasyn túsirip, taratýdy surap otyrmyz. Bul baǵytta 16 mln teńge qarajat qajet. Bul tildi úırenýge, memlekettik tildiń mańyzyn, eldiń tilge degen kózqarasyn jaqsartý, memlekettik tildiń tóńiregine toptastyrý maqsatymen qysqa metrajdy rolıkterdiń serııasyn shyǵaramyz. 1 mınýtqa jetpeıtin, ár túrli áleýmettik sıtýatsııalardy beıneleıtin bul rolıkter Instagram-da, áleýmettik jelide smartfon arqyly taratylady. Sonyń kómegimen tilge baılanysty ártúrli oqıǵalardy túsindirý kózdelip otyr», - dedi Sáken Esirkep.

Eske salaıyq, buǵan deıin Respýblıkalyq onomastıkalyq komıssııa elimizde qaıta qurylǵan jańa oblystardyń ataýlaryn maquldaǵan bolatyn.