Nur-Sultannyń úzdik ustazdaryna 40 mln teńge tabys etildi

Qala ákimdiginen málim etkendeı, alǵash ret qala basshysy atynan «Nur-Sultan qalasynyń qurmetti pedagogy» medaliniń ıegerlerine qosymsha 833 myń teńgeden berildi. Barlyǵy pedagogtarǵa 40 mln teńgeden astam qarajat tabys etildi. Sonymen birge birqatar oqý ornyna 9 mln teńgeden ákim granty usynylǵan.

«Elbasy Nursultan Ábishuly Nazarbaevtyń «Bilimdi urpaq« ıdeıasyna sáıkes memleket sapaly bilimge erekshe kóńil bóledi. Elordada jyl saıyn oqý oryndaryn salyp jatyrmyz. Bıyl salynǵan mektepter sany ótken jylmen salystyrǵanda eki esege artyq. Osy jyly 12 mektep salyndy. Kelesi jyly taǵy sonsha mektep salynady. Oqý oryndaryn zamanaýı jabdyqtarmen jabdyqtap, ınnovatsııalyq tehnologııalardy engizemiz.

Memleket basshysy «Pedagog mártebesi týraly« zańǵa qol qoıdy. Osy jyldyń 1 qańtarynan bastap pedagogtardyń jalaqysy 25%, odan ári 2024 jylǵa deıin taǵy 25% ósedi. Ótken jyly biz turǵyn úı satyp alý úshin áleýmettik járdemaqy túrinde 1 mln teńge kólemindegi 275 sertıfıkatty óteýsiz negizde bóldik. Bıyl da ustazdarymyzǵa turǵyn úı jaǵdaıyn jaqsartýǵa kómektesemiz. Qazaqstandyq ıpotekalyq kompanııamen birlesip 1 myń áleýmettik páter beremiz. Bul páterler muǵalimderge, áleýmettik qyzmetkerlerge, polıtsııa qyzmetkerlerine, dárigerlerge, órt sóndirýshilerge, mádenıet jáne sport qaıratkerlerine beriledi. Túlekterge de qoldaý kórsetiledi. Mamandyqty tegin oqýǵa 900-ge jýyq grant bólindi. Qabyldanyp jatqan sharalar jumys úshin neǵurlym qolaıly jaǵdaı jasaýǵa jáne balalardyń sapaly bilim alyp, básekege qabiletti bolýyna baǵyttalǵan. Sizdiń qajyrly eńbegińiz úshin alǵys aıtamyn!»,- dedi elorda ákimi Altaı Kólginov.

Elordalyq pedagogtarǵa «Halyq alǵysy», «Eńbek ardageri» medaldary, «Qazaqstan Respýblıkasynyń Bilim berý isiniń qurmetti qyzmetkeri» jáne Bilim jáne ǵylym mınıstrliginiń «Y.Altynsarın» tós belgileri, gramotalar jáne taǵy basqa da marapattar tabys etildi.