Nur-Sultannyń tarıhı nysandaryna tegin ekskýrsııalar uıymdastyrylýda

NUR-SULTAN. QazAqparat – Nur-Sultan qalasynyń turǵyndary men qonaqtaryna tarıhı nysandar boıynsha tegin ekskýrsııalar uıymdastyrylýda, dep habarlaıdy QazAqparat.

Ár sársenbi saıyn ótkiziletin ekskýrsııalarǵa kásibı gıdter jumyldyrylǵan.

QR Tuńǵysh Prezıdenti N.Nazarbaevtyń «Rýhanı jańǵyrý: bolashaqqa baǵdar» maqalasy aıasynda «Rýhanı jańǵyrý» jobalyq keńsesi qolǵa alǵan jobanyń maqsaty – elorda aýmaǵyndaǵy tarıhı jerlerdi halyqqa keńinen nasıhattap, tanymal etý.

Qonaqtar «Qazaqstannyń kıeli jerleriniń geografııasy» jobasyna engen 7 jáne basqa da tarıhı nysandardy tamashalap, olardyń tarıhymen keńirek tanysa alady. Atap aıtqanda «ALJIR» saıası qýǵyn-súrgin jáne totalıtarızm qurbandaryn eske alý memorıaldy-murajaı kesheni, kópes Vasılıı Kýbrınniń úıi, «Kýbrın jáne uldary» kópester seriktestiginiń saýda úıi, kópes P. S. Sılınniń turǵyn úıi, «Jasyl» meshitiniń qorshaýy, burynǵy musylman mektebi, qalalyq basqarma ǵımaraty, gımnazııa (HІH ǵ. aıaǵy) jáne taǵy da basqa tarıhı ǵımarattar bar.

«Aıta keteıik, ekskýrsııany arnaıy daıyndalǵan ólketaný mamandary júrgizedi. Oǵan qatysý úshin uıymdastyrýshylarǵa aldyn ala habarlasyp, ótinim qaldyrý kerek. Tolyq aqparatty 7 701 569 5108, 7 747 251 0701 nómirleri arqyly joba uıymdastyrýshylarynan bilýge bolady. Ekskýrsııa ár sársenbi saıyn saǵat 10.00-de bastalady. Jınalý orny Otyrar kóshesi, 1/2 meken jaıy boıynsha ornalasqan burynǵy musylman mektebiniń janynda», - delingen ákimdik habarlamasynda.