Nur-Sultannyń kólik júıesi Eýropa, TMD jáne Ortalyq Azııada úzdik dep tanyldy
NUR-SULTAN. QazAqparat - Nur-Sultannyń ıntellektýaldy kólik júıesi Eýropa, TMD jáne Ortalyq Azııa elderi arasynda 1-shi orynǵa ıe boldy.
Bul 12 eldiń 40 qalasy. «Aqyldy» qalalardy damytý máseleleri IDC Smart City Forum onlaın rejıminde talqylandy, dep habarlaıdy QazAqparat elorda ákimi Altaı Kólginov óziniń Instagram paraqshasyna silteme jasap.
Onyń jazýynsha, Nur-Sultanda qala odan ári qaýipsiz etý maqsatymen birqatar joba qolǵa alyndy:
Birinshi. Kóshelerde aqyldy kamera ornatýdyń nátıjesinde jol-kólik oqıǵalarynyń sany 40% - ǵa azaıdy, ólim-jitim eki ese azaıdy. Jol qozǵalysyna qatysýshylar tártip saqtaı bastady.
Ekinshi. «Qaýipsiz aýla» jobasyn iske asyryp jatyrmyz. Turǵyndardyń ótinishi boıynsha aýlalarda kameralar ornatyp kelemiz. Bul qaýipsizdik deńgeıin arttyrýǵa: urlyq, memlekettiń eáne jeke azamattardyń múlkin búldirý jáne basqa da quqyqbuzýshylyqtar sanyn qysqartýǵa múmkindik beredi.
Úshinshi. Mektepter men balabaqshalar qaýipsizdik deńgeıin arttyrý úshin kameralarmen qamtyldy.
Tórtinshi. Barlyq avtobýstar jol aqysyn qolma-qol aqshasyz tóleýge arnalǵan valıdatorlarmen jabdyqtalǵan. Bul kóleńkeli aınalym máselesin sheshýge múmkindik berdi. Pandemııa ýaqytynda tsıfrlandyrýdy damytý qanshalyqty mańyzdy ekenin kórip otyrmyz, óıtkeni baılanyssyz tólemniń arqasynda vırýstyń taralý qaýpin azaıtýǵa múmkindik týdy. Sonymen qatar, Face Pay tólem júıesi engizildi – júıe adamdy tanyp, jol júrý tólemi avtomatty tólenedi. Jobamen qamtylǵan avtobýstar sanyn arttyramyz.
«Bul baǵyttar-tikeleı qaýipsiz qozǵalysqa jáne quqyqbuzýshylyqtar sanyn azaıtýǵa baǵyttalǵan jobalardyń bir bóligi ǵana. Tsıfrlandyrýdy barlyq baǵyttar boıynsha, sonyń ishinde elordany tsıfrlandyrýdy «Smart City» tujyrymdamasy aıasynda júrgizemiz»,-dep jazady elorda ákimi.
