Nur-Sultannyń qaı aýdandarynda jańa saıabaqtar salynady

NUR-SULTAN. QazAqparat – Nur-Sultan qalasy qorshaǵan ortany qorǵaý jáne tabıǵat paıdalaný basqarmasynyń basshysy Álııa Qojabaeva qalada ashylatyn jańa saıabaqtardyń tizimin jarııalady, dep habarlaıdy QazAqparat.

«2022 jyly ınvestıtsııalyq jobalardy júzege asyrýǵa jergilikti bıýdjetten 470 mln teńge qarastyrylǵan. Bıyl 9 skver salý josparlanǵan, onyń tórteýi qalanyń shetki bólikterinde ashylady», - dedi ol qalalyq máslıhattaǵy eseptik kezdesýde.

Máselen, Esil aýdanyndaǵy Ilınka turǵyn alabynda bir saıabaq salynady, jobanyń quny - 435 mln teńge, Almaty aýdanynda – Jeleznodorojnyı (380 mln teńge) jáne Internatsıonalnyı (195 mln teńge) turǵyn alaptarynda eki skver salý josparlanýda. Saryarqa aýdanynda úsh skver ashylady, olar – Kóktal aýdanynda, Sh. Aıtmatov, S 409 jáne 187-kóshede ornalaspaq.

Sonymen birge, Pýshkın kóshesi boıynsha jalpy quny 128 mln teńgege, A. Kenjın, A. Úlimjiuly, Daırabaı jáne M. Móńkeuly kósheleriniń ortasynda (147 mln teńge), A. Imanov kóshesi mańynda (125 mln teńge) skverler salý josparlanýda.

Abaı dańǵylynyń 53/1, 57/1 úıleri qasyndaǵy saıabaq 72,5 mln teńgege qaıta jańartylady.

Basqarma basshysy Telman turǵyn alabynda (700 mln teńgege) jáne Máńgilik el, Qabanbaı batyr, Saýran, Hýseın ben Talal kóshelerindegi (5 mlrd teńgege) jańa eki saıabaq ashylatynyn aıtty.

Syǵanaq, Ánet Baba, Qazybek bı, Roza Baǵlanova (Taldykól) kósheleri aýmaǵynda quny 34 mln teńge bolatyn 30,3 gektarlyq rekreatsııalyq aımaq qurylady.

Sonymen qatar, jaıaý júrginshiler aımaǵyn qaıta jańartý, qoǵamdyq keńistikti jaılastyrý (1,2 mlrd teńge) jáne velojol qurylysyn jalǵastyrý josparlanǵan.