Nur-Sultannyń Baıqońyr aýdanynda 35 kópqabatty úı súriledi
NUR-SULTAN. QazAqparat –Elordanyń Baıqońyr aýdanynda 174 úı jóndeýdi qajet etedi, dep habarlaıdy QazAqparat tilshisi.
Baıqońyr aýdany ákiminiń orynbasary Jasulan Baıjanov Múlik ıeleri birlestikterin qurý máselesine arnalǵan qoǵamdyq tyńdaýda osyndaı málimet aıtty.
«Aýdandaǵy turǵyn úı qorynyń sapasyn jaqsartý úshin 2020 jyly úılerdi túgeldeı pasporttaǵan bolatynbyz. Ár úıge tólqujat jasap, problemasyn jeke-jeke qaradyq. Pasporttaý qorytyndysy boıynsha 446 úıdiń 206-synda ǵana aqaý joǵy belgili boldy. 174 úıdi jóndeý qajet. Onyń ishinde 53 úıdiń jaǵdaıy óte múshkil. Aýanymyzda eski úılerdi súrý máselesi de ózekti. Jóndeý kómektespeıdi degen 35 kópqabatty úı bar. Onyń altaýy 63-76 paıyz arasynda tozǵan. Al 29 kópqabatty úı 33-59 paıyz arasynda tozǵan. Eski úılerdi súrýdiń 2023-2025 jyldarǵa josparlanǵan úshinshi kezeńine osy úıler eneıin dep tur», - deıdi ákimdik ókili.
Sondaı-aq, ol barak tıptegi 29 úıdiń de súriletinin aıtty.
«Barak tıpindegi 29 úı súrip tastaýǵa jatqyzylǵan. Olardyń tozý kórsetkishi 50-77 paıyz arasynda. Pasporttaý qorytyndysy boıynsha aqaý tabylǵan úılerdiń sapasyn jaqsartý týraly jumys jospary jasaldy. Turǵyndar arasynda turǵyn úı sharýshalyǵyn jańǵyrtý baǵdarlamasy belsendi túrde túsindirilip jatyr. Qazir 17 úıdi osy baǵdarlamaǵa daıyndap jatyrmyz. Taǵy 3 úıdiń qujaty bir aptanyń ishinde bitedi. Bıyl 20 úıdiń qujatyn daıyndasaq, qalǵany kelesi jylǵa qalǵaly tur», - dedi Jasulan Baıjanov.
