Nur-Sultannyń azyq-túlik beldeýi: Aqmola oblysynda 41 joba júzege asyrylýda
Bul týraly oblys ákimdiginiń otyrysynda oblystyq ekonomıka jáne bıýdjetti josparlaý basqarmasynyń basshysy Qanat Dúzelbaev málimdedi, dep habarlaıdy QazAqparat tilshisi oblys ákimdiginiń baspasóz qyzmetine silteme jasap.
Vedomstvonyń málimetinshe, bıyl Nur-Sultan qalasynyń aınalasyndaǵy azyq-túlik beldeýiniń sheńberinde jalpy somasy 47 mıllırad teńge bolatyn 41 jobany júzege asyrý josparlanǵan. Onyń ishinde mal bordaqylaý alańy men asyl tuqymdy reprodýktorlardy salý boıynsha 4 joba, sút mal sharýashylyǵy boıynsha 8 joba, etti mal sharýashylyǵyn ashý boıynsha 12 joba, aýyl sharýashylyq ónimderin qaıta óńdeý boıynsha 6 joba, astyq qoımasy men kartop qoımasyn salý boıynsha 5 joba, qus sharýashylyǵyn damytý boıynsha 2 joba, balyq ósirý boıynsha 2 joba, sýarý júıesin qurý boıynsha 2 joba bar.
«Búginde jalpy somasy 3,6 mıllıon teńgeni quraıtyn 22 joba júzege asyryldy. Sonymen qatar oblystyń aýyl sharýashylyǵy taýarlaryn óndirýshilermen astana bazarlaryna 85,4 myń tonna sút ónimderi, 17,2 myń tonna et ónimderi, 184,2 mıllıon dana jumyrtqa jetkizildi»,- deıdi oblystyq ekonomıka jáne bıýdjetti josparlaý basqarmasynyń basshysy Qanat Dúzelbaev.
Oblys ákimi Ermek Marjyqpaev oblystyq aýyl sharýashylyǵy basqarmasyna azyq-túlik beldeýi sheńberinde qolǵa alynǵan jobalardy josparlanǵan merziminde iske qosýdy, sondaı-aq, mal basy men et jáne sút óndirisiniń ósimin qamtamasyz etýdi tapsyrdy.
