Nur-Sultannan urlanǵan kólik Aqmola oblysynda ustaldy
KÓKShETAÝ. QazAqparat – Aqmola oblysynyń polıtseıleri elordalyq áriptesterine urlanǵan kólikti ustaýǵa kómektesti, dep habarlaıdy QazAqparat tilshisi.
Oblystyq PD baspasóz qyzmetiniń málimetinshe, shildeniń 14-de Tselınograd aýdanynyń PB kezekshilik bólimine Nur-Sultan qalalyq polıtsııa departamentiniń jedel basqarý ortalyǵynan «Lada prıora» kóligi urlanǵany týraly shuǵyl habar túsken.
«Astanalyq áriptesterimizdiń aqparatynsha, kúdikti aıdap áketken kólik «Ekaterınbýrg – Almaty» tas jolynyń boıyndaǵy «Rýbej» baqylaý beketi arqyly Astrahan baǵytyna qaraı júrip ótken. Kezekshi-ınspektor barlyq málimetterdi birden elordanyń irgesinde júrgen jol-patrýldyq polıtsııa rotasynyń qyzmetkerlerine joldady», dep málim etti vedomstvodan.
Arada 5-7 mınýt ótken kezde respýblıkalyq avtojoldyń 1224 shaqyrymynda polıtsııa kapıtandary Beısenbaı Hamıtjanov pen Ádilbek Boranbaevtyń avtopatrýli atalmysh kólikti baıqap, izine túsken. Alaıda, kólik júrgizýshi toqtaý týraly belgige qulaq aspaı, jyldamdyqty odan saıyn údetken.
«Uzaq ýaqyt qýǵynnan keıin kúdikti ustaldy. Ol urlanǵan kólikpen qatty jyldamdyqta júrgendikten jol qozǵalysynyń ózge qatysýshylarynyń qaýipsizdigi qamtamasyz etildi», - dep tolyqtyrdy vedomstvodan.
Aqmolalyq polıtseıler ustalǵan kúdikti men kólikti birden elordalyq áriptesterine tapsyrdy.
