Nur-Sultannan Almaty, Qostanaı jáne Shymkentke qosymsha poıyzdar qatynaı bastaıdy
«Búginde el aýmaǵynda poıyz qatynaıtyn 138 baǵyt bar. Onyń ishinde 104 marshrýt boıynsha tasymalǵa biz jaýaptymyz. Qalǵan baǵyttarǵa jeke tasymaldaýshy kompanııalar jaýapty. Elimizde ulttyq tasymaldaý kompanııasynan bólek, 9 jeke kompanııa bar. Aldaǵy shilde-tamyzda «Nur-Sultan – Qostanaı», «Nur-Sultan – Almaty» jáne «Nur-Sultan – Shymkent» baǵyty boıynsha qosymsha poıyzdardy iske qosý josparlanyp otyr. Onyń ishinde aldyńǵy 2 baǵyt boıynsha Talgo poıyzy qatynamaq. Jalpy qazir QTJ-ǵa qarasty 2215 vagon bar. Onyń ishinde 1429 burynǵy standartty vagon jáne 670 Talgo vagondary», - dedi Jánibek Taıjanov ortalyq kommýnıkatsııalar qyzmeti alańynda ótken baspasóz máslıhatynda.
Basqarma tóraǵasynyń aıtýynsha, elimizde poıyz qyzmetine qatysty jańa standart engizildi.
«Jańa standarttyń ishine tazalyq saqtaý, qyzmet kórsetý kiredi. Poıyzdarǵa qatysty buǵan deıin bolǵan problema – bılet satýshy deldaldar jáne bıletterdi jappaı satyp alyp tapshylyqty qoldan jasaý máselesi sheshildi. Atalǵan máselelerdi sheshý úshin 2 jyl buryn «Mobıýs» bılet satý júıesi iske qosylǵan edi. Jańa júıe tıimdiligin kórsetti. Qazir alypsatarlyq joq», - deıdi ol.
Sondaı-aq, «Jolaýshylar tasymaly» AQ basshysy pandemııadan keıin TMD boıynsha Qazaqstan halyqaralyq poıyz reısterin qaıta iske qosqan alǵash el ekenin aıtyp otyr.
«Búginde 11 halyqaralyq poıyz reısi bar. Olar Reseıdiń Astrahan, Omby, Samara qalasyna qatynaıdy. Sonymen qatar Ózbekstan men Qyrǵyzstan astanasy Bishkekke poıyzdar qatynap tur», - dedi J. Taıjanov.
