Nur-Sultannan 80 tonna gýmanıtarlyq kómek Arysqa jol tartty
Kásipkerler men jastar uıymdarynyń, ákimdik ókilderiniń kúsh salýymen elorda halqynan jınalǵan gýmanıtarlyq kómektiń ekinshi legi Arysqa jóneltildi.
"Jas sarbaz" jasóspirimder áskerı-patrıottyq qozǵalysynyń Nur-Sultan qalalyq fılıalynyń tóraǵasy, Ashat Nalshybektiń aıtýynsha, astanalyq turǵyndar Arystaǵy aǵaıynǵa barynsha belsendi kómek jınap jatyr.
"Elorda halqy Arystaǵy apatty kúızele qabyldaǵanyn kómektesýge nıetti adamdardyń moldyǵynan baıqaýǵa bolady. Ózim de Arystyń týmasymyn. Osynda oqýǵa túsip, jumysqa ornalastym. Qıyn kezde zardap shekken jurtqa kómek qolyn sozyp jatqan nursultandyqtarǵa Arystyń týmasy retinde alǵys aıtamyn. Óz zamandastarymyz qarjylaı kómek jınaý úshin birlesip baryp qan da tapsyrdy. Sonyń aqshasyn korporatıvtik qorǵa aýdardy", - deıdi belsendi jas.
Nur-Sultan qalasy ákiminiń orynbasary Erlan Kanalımov Arys qalasyndaǵy úılerdi qalpyna keltirýge 19 qurylys jasaǵy qatysatynyn aıtady.
"Alǵashqy eki kúnde memlekettik organdar men kásiporyndar Arysqa kómek retinde bir kúndik eńbekaqy esebinen 200 mln teńge aýdardy. Keshe 3 júk kóligi shyqqan, búgin tórteýin attandyryp otyrmyz. Al erteń taǵy 3 júk kóligin jiberemiz. Qala ákiminiń taǵy bir orynbasary qurylys mamandarymen Arysta júr. Bizdiń usynysymyzdy elordanyń qurylys kompanııalary qoldap, 19 qurylys jasaǵy quryldy.Ár jasaqta keminde 10 maman bar. Qurylys materıaldaryn da ózimiz alyp baramyz. Birinshi úı ıelerimen birge ár úıdiń aqaý aktisi jasalady. Sol boıynsha 9-sektordaǵy 500 úıdiń qaısysyn jóndeý kerektigi belgili bolady. 19 jasaq palata qalashyǵynda jatyp, bir aıdyń ishinde úılerdi qalpyna keltiredi. 50 erikti jas baryp, turǵyndardyń kóshýine kómektesedi. Qazirdiń ózinde 50 erikti stýdent medıtsınalyq kómek kórsetip júr",- deıdi Nur-Sultan Erlan Kanalımov.
