Nur-Sultanǵa Sibirdegi orman órtiniń tútini taǵy kelýi múmkin
NUR-SULTAN. QazAqparat – Sibirdegi orman órtine baılanysty Nur-Sultan turǵyndarynyń alańdaýyna esh negiz joq. Bul týraly elordanyń Taýarlar men qyzmetterdiń sapasyn jáne qaýipsizdigin baqylaý departamentiniń basshysy Sádýaqas Baıǵabylov málimdedi, dep habarlaıdy QazAqparat tilshisi.
«Aldyn ala boljaǵanymyzdaı, demalys kúnderi Nur-Sultanda aýa raıy turaqtaldy. RF Irkýstk oblysy men Krasnoıarsk ólkesindegi orman órtinen shyqqan tútin Qazaqstan aýmaǵyna keldi. Ol birtindep taraı otyryp Almaty oblysynyń soltústik aýdandaryna deıin jetti. Atap ótkim keletini, beısenbi-juma kúnderi astanada bolǵan tútin adamdardyń densaýlyǵyna zııan keltirgen joq. Óıtkeni onyń quramynda zııandy hımııalyq zattar bolǵan joq. Ony jylda qys aılarynda Nur-Sultanda bolatyn tútinge uqsatýǵa bolady. Búgin, 30 shilde, seısenbi kúni - kún ashyq. Elorda aýmaǵyndaǵy atmosferada zııandy zattar tabylǵan joq. Nur-Sultanǵa tútin taǵy da kelýi múmkin. Óıtkeni RF aýmaǵynda 3 mıllıon gektar orman otqa orandy. Degenmen, jeldiń soǵýyn jáne orman órtengen jer men Qazaqstan arasyndaǵy qashyqty da eskergen jón», - dedi S. Baıǵabylov.
Onyń aıtýynsha, endigi jerde Sibirdegi orman órtinen shyqqan tútin Qazaqstan astanasyna jeter-jetpes tarap ketedi. Túıindeı aıtqanda, Nur-Sultan turǵyndary Sibirdegi orman órtine alańdamaýyna bolady.
Avtor: Meırambek Baıǵarın
