Nur-Sultanǵa halyqaralyq reıspen kelgen taǵy 101 jolaýshy karantınge jatqyzyldy
NUR-SULTAN. QazAqparat – Búgin túnde Nur-Sultan qalasynyń áýejaıyna shetelden alty ushaq kelip qondy. Áýe reısterin Turkish Airlines, Air Astana, Velavia men Flydubai áýe kompanııalary oryndaǵan, dep habarlaıdy QazAqparat tilshisi áýejaıdyń baspasóz qyzmetine silteme jasap.
Astanaǵa ushyp kelgen jolaýshylardyń 101-de PTR-anyqtamasy bolmaǵan, keıbirinde anyqtamasynyń ýaqyty ótip ketken. Olar karantındik statsıonarǵa jatqyzyldy. PTR-testten ótkennen keıin olar úılerine qaıtarylady. Koronavırýs juqtyrǵany belgili bolǵan jaǵdaıda ınfektsııalyq statsıonarǵa jatqyzylady.
Eske sala ketsek, 6 qazan kúni saǵat 00.00 kezinde QR Bas memlekettik sanıtarlyq dáriger Erlan Qııasovtyń memlekettik shekaradaǵy ótkizý beketteri arqyly koronavırýs ınfektsııasynyń taralýyn aldyn alý sharalaryn kúsheıtý týraly qaýlysy shyqqan edi.
Jańa erejelerge sáıkes mynadaı shekteý sharalary kúshine enedi:
Qazaqstanǵa shetelden áýe reısi arqyly kelgen azamattardyń bári de termometrııadan, anketalaýdan ótip, PTR ádisi arqyly COVID-19 boıynsha testten ótkeni týraly anyqtama (72 saǵatqa jaramdy) kórsetýi tıis;
Qazaqstan azamaty sanalmaıtyndar adamdar qolynda anyqtama bolmaǵan jaǵdaıda elge kirgizilmeıdi.
Dene temperatýrasy shekti normada bolǵan jáne anyqtama kórsetken azamatqa COVID-19 belgileri boıynsha túsindirý jumystary júrgizilip, tıisti qolhat berilgennen keıin olar baratyn jerine jiberiledi.
Dene qyzýy bar adamdar qolynda anyqtama bar-joǵyna qaramastan eki aptaǵa karantındik statsıonarda oqshaýlanady. Ol jerde atalmysh azamat COVID-19 boıynsha tekserýden ótedi.
COVID-19 boıynsha testten ótkennen keıin koronavırýs juqtyrǵany belgili bolǵan azamattar ınfektsııalyq statsıonarǵa aýystyrylady. Al juqtyrmaǵany anyqtalǵan azamattarǵa túsindirý júrgizilip, tıisti qolhat beriledi.
Ushyp kelgen QR azamattary anyqtama bolmaǵan jaǵdaıda eki táýlikke karantındik statsıonarǵa jatqyzylady. Ol jerde atalmysh azamat COVID-19 boıynsha tekserýden ótedi.
COVID-19 boıynsha testten ótkennen keıin koronavırýs juqtyrǵany anyqtalmaǵan azamattarǵa túsindirý júrgizilip, tıisti qolhat beriledi.
COVID-19 juqtyryp kelgeni belgili bolǵan azamattar ınfektsııalyq statsıonardyń karantındik oqshaýlaǵyshyna jatqyzylady.
