Nur-Sultandaǵy jármeńkege elimizdiń barlyq óńirinen 4 300 tonnadan astam ónim ákelindi
NUR-SULTAN. QazAqparat - Elordada SQO men Pavlodar oblysy óndirýshileri taýarlarynyń jármeńkesi ótýde. Qyrkúıek aıynyń basynan bastap jármeńkelerge elimizdiń barlyq óńirleri qatysty. Bul týraly Nur-Sultan qalasynyń ákimi Altaı Kólginov óz Instagram paraqshasynda jazdy, dep habarlaıdy ákimdiktiń resmı saıty.
«Demalys kúnderi elordada ótip jatqan óńirlerdiń aýyl sharýashylyǵy jármeńkesi osy aptada qorytyndylanady. Qyrkúıek aıynyń basynan bastap jármeńkege elimizdiń barlyq oblystary qatysty. Búgin jáne erteń Pavlodar jáne Soltústik Qazaqstan oblystary óz ónimderin usynady.
Aýyl sharýashylyǵy jármeńkeleri kezinde Nur-Sultanǵa 4 myń 300 tonnadan astam ónim ákeldi. Mundaı jármeńkelerdi ótkizý áleýmettik mańyzy bar taýarlardyń baǵasyn bir qalypta ustaýǵa múmkindik beredi. Ónimder naryqtyq baǵadan 15-20%-ke tómen. Barlyq jetkizilgen taýarlar sertıfıkattalǵan jáne veterınarlyq baqylaýdan ótken. Epıdemııalogııalyq jaǵdaıdy eskere otyryp, barlyq sanıtarııa normalary saqtaldy.
Aýyl sharýashylyǵy jármeńkelerine qatysqany úshin ákimderge men óńirlerdegi aýyl sharýashylyǵy taýarlaryn óndirýshilerge alǵys aıtamyn!
Sonymen qatar, áleýmettik mańyzy bar azyq-túlik taýarlarynyń baǵasyn ustap turý úshin birqatar sharalar qabyldandy: «aınalym tetigi» jobasyn jalǵastyrdyq. Saýda jelilerine azyq – túlik satyp alýǵa bólinetin soma 13 eseden astam - 180 mln teńgeden 2,4 mlrd teńgege deıin ulǵaıdy. Bul áleýmettik mańyzy bar ónimderdiń 16 túriniń baǵasyn ustap turýǵa múmkindik beredi.
Sondaı-aq, eger buryn jobaǵa saýda jelisiniń 4 nysany qatyssa, qazir 12-Magným, Astyqjan, Kenmart, Vkýsmart, A2, Metro, Anvar, Rahmet, Aqmol, Smoll, Artem, Shapaǵat. Sonymen qatar, turaqtandyrý qory quryldy», - dep jazdy Altaı Kólginov.
