Nur-Sultandaǵy jármeńkede 600 tonna ónim satylady

NUR-SULTAN. QazAqparat - Elordada aýyl sharýashylyǵynyń kezekti jármeńkesi aldaǵy demalys kúnderi, 2-3 qazanda ótedi. Bul joly Qaraǵandy oblysynyń aýyl sharýashylyǵy taýarlaryn óndirýshileri óz ónimderin usynady, sondaı-aq Nur-Sultan qalasy kásipkerleriniń taýarlaryn satyp alýǵa bolady, dep habarlaıdy QazAqparat qala ákimdiginiń resmı saıtyna silteme jasap.

Jármeńke dástúrli túrde «Han Shatyr» SOO alańynda ótedi (D. Qonaev kóshesi jáne Turan dańǵylynyń qıylysy).

Qaraǵandy oblysynyń 9 aýdany men 4 qalasynyń 126 fermerlik sharýashylyǵy men qaıta óńdeý kásiporyndary óz ónimderin usynady.

Barlyǵy 600 tonnadan astam ónimdi satý josparlanyp otyr. Sórelerge azyq-túlik ónimderiniń 117 túri qoıylady, onyń ishinde:
- ettiń barlyq túri - 150,1 tonna,
- balyq - 4,3 tonna,
- jumyrtqa - 200 myń dana,
- sút ónimderi - 20 tonna,
- kartop jáne kókónister - 495 tonna
- shujyq, kondıterlik, nan-toqash ónimderi - 11,4 tonna.

Jármeńke Nur-Sultan qalasynyń Taýarlar men qyzmetterdiń sapasy men qaýipsizdigin baqylaý departamenti usynǵan sanıtarlyq normalardy saqtaı otyryp ótkiziledi.

Esterińizge sala keteıik, elordada bıyl áleýmettik mańyzy bar azyq-túlik ónimderiniń baǵasyn turaqtandyrý maqsatynda ári kókónister men jemisterdiń pisý merzimin eskere otyryp, 14 jármeńke ótkizý josparlanǵan. Nur-Sultanda óńirlik aýylsharýashylyq jármeńkeler maýsymy 31 qazanǵa deıin jalǵasady. 21 tamyzdan bastap elordadaǵy jármeńkelerde Túrkistan, Batys Qazaqstan, Shyǵys Qazaqstan, Qyzylorda, Almaty, Atyraý, Jambyl jáne Aqtóbe oblystarynyń aýylsharýashylyq taýar óndirýshileri óz ónimderin usyndy.