Nur-Sultandaǵy saýda úılerinde ekpe saldyrǵan turǵyndar syılyq pen jeńildikter ala alady
«Nur-Sultan qalasy sanıtarlyq-epıdemıologııalyq baqylaý departamentimen birlesip, sanıtarlyq talaptardy saqtaı otyryp, qalanyń 9 iri saýda-oıyn-saýyq ortalyqtary men saýda úılerinde vaktsına egý pýnktteri ashyldy. Olar: «Mega Silk Way», «Keruen», «Han Shatyr», «Saryarqa», «Ábý-Dabı Plaza», «Azııa Park», «Eýrazııa», «Álem» jáne «Mechta». Saýda nysandaryndaǵy vaktsınalaý pýnktteri demalyssyz tańǵy 10:00-den keshki 22:00-ge deıin jumys isteıdi», - dedi E. Bekmurzaev elorda ákimdiginde ótken baspasóz máslıhatynda.
Onyń aıtýynsha, turǵyndardy vaktsınalaýǵa yntalandyrý úshin keıbir saýda ortalyqtarynda jeńildik baǵdarlamalary men kásipkerlerden syılyqtar oınatylady.
«Vaktsına alǵan azamattar syılyq ala alady nemese utys oıynyna qatysa alady. Mysaly, ekpeden keıin «Saryarqa» SOO-da Actual Optic-ten 5 myń teńgege jeńildik kýponyn alýǵa bolady. Sondaı-aq, blankti toltyryp, Kınoparkten jeńildik alýǵa bolady. «Azııa Park» SOO-da kásipkerlerdiń júldeleri (turmystyq tehnıka, elektronıka, SOO jalǵa alýshylar atynan syılyqtar) jáne t. b. oınatylady», - dep túsindirdi basqarma ókili.
Aıta keteıik, vaktsınalaý pýnktterinde Spýtnık V, QazVac jáne Hayat-Vax («Haıat-Vak») vaktsınalary usynylǵan. Ekpe alý úshin endi emhanaǵa tirkelý, aldyn ala jazylý nemese portalǵa tirkelý qajet emes.
