Nur-Sultandaǵy órt jaǵdaılarynyń negizgi úsh sebebi qandaı

Nur-Sultan qalasynyń TJD apat qaýpin azaıtý men azamattyq qorǵanys salasyn baqylaý basqarmasynyń bastyǵy Erkin Otarǵalymulynyń aıtýynsha órt kóbinese jeke sektorda tirkeledi.

«Jalpy qalada órt jaǵdaılarynyń sany jyldan jylǵa azaıyp kele jatqanyn atap ótkim keledi. Bul – óz kezeginde atqarylǵan jumystyń oń nátıje berip jatqanyn, sonymen qatar halyqtyń qaýipsizdikke basa mán beretinin bildiredi. Jalpy elordada jyl basynan beri bolǵan órtterdiń 52 paıyzy jeke turǵyn úı sektoryna tıesili. Órtterdiń shyǵý sebepterin talqylaıtyn bolsaq, órttiń kóbi, ıaǵnı 179 oqıǵa – elektr jelilerin montajdaý nemese paıdalaný kezinde tirkelgen. Ekinshi orynda – adamdardyń abaısyzdyǵy. Osy jaǵdaıdyń 106 faktisi tirkeldi. Bul kórsetkishtiń byltyrǵy jylmen salystyrǵanda óskeni baıqalyp otyr», - dedi Erkin Otarǵalymuly elorda ákimdigindegi onlaın brıfıng barysynda.

Onyń aıtýynsha órtterdiń shyǵýynyń negizgi úshinshi sebebi – jylytý peshterin paıdalaný kezinde oryn alǵan kemshilikterdiń saldary.

«Jalpy qaýipsizdik máselelerine mán beretin bolsaq, búgingi tańda jeke turǵyn úı sektorynda órt qaýipsizdigin qamtamasyz etý – ózekti máselelerdiń biri bolyp sanalady. Sebebi 2011 jyldan bastap memlekettik órtke qarsy qyzmet jeke turǵyn úılerdi tekserý jumystarynan shettetildi. Búgingi tańda atalǵan jumystar úgit-nasıhat jumystarymen shekteledi. Sonymen qatar qoldanystaǵy zańnamaǵa sáıkes jeke múliktiń saqtalýyna, durys paıdalanylýyna, sonymen qatar qaýipsizdigin qamtamasyz etý – tikeleı turǵyndardyń mindeti ekenin taǵy da eske salamyz», - dedi ol.