Nur-Sultandaǵy mektep ortalyq jylytý júıesine qosyla almaı álek

NUR-SULTAN. QazAqparat - «Nur-Sultan adaldyq alańy» jobalyq keńsesiniń sarapshylary arnaıy monıtorıngtik toppen birge elordadaǵy birqatar mektepti aralap shyqty, dep habarlaıdy QazAqparat Elorda Info saıtyna silteme jasap.

№61 mektepti ortalyq jylytý júıesine qosý jumysy eki jyl buryn bastalǵanymen, jospar áli kúnge deıin júzege aspaǵan. Ókinishke qaraı, eki jyl buryn jylytýdyń qural-jabdyǵyn aýystyrýǵa mindetti bolǵan merdiger óz qyzmetine salǵyrttyq tanytqan.

Al bıyl iske kirisken jańa merdiger isten shyqqan jabdyqtardy qosa almaı álek. Sonyń saldarynan 30 tamyz kúni aıaqtalýy tıis bolǵan jumystar bir aıǵa keshiktirilgen. Tipti, qazirdiń ózinde sońǵy jumystar áli bitpegen. Degenmen, bilim oshaǵynyń ujymy avtonomdy júıege qosylýǵa úmitti.

Osy mektepke jaz sońynda kelgen «Adaldyq alańy» sarapshylary sol kezde de atalǵan kemshilikterdi kórip, merdigerden óz jumysyn ýaqytyly bitirýdi talap etken bolatyn. Qoǵamdyq baqylaý ókilderi jaǵdaıdy jiti qadaǵalap otyr. Jaqyn kúnderi atalǵan mektep ortalyq jylytý júıesine qosylýy tıis.

Al №10 mekteptiń jaǵdaıy múlde basqasha. Ǵımarat qysty kúnderi durys jylymaıdy. Syrtyn arnaıy materıaldarmen qaptaý josparlanǵan. Atalǵan maqsatqa qalalyq bıýdjetten 349 mln teńge qarjy da bólingen. Osy jumystardyń sapasyn baqylaý maqsatynda «Adaldyq alańy» sarapshylary bul jerde bir aı buryn bolyp, qurylystyń kemshilikterin eskertken. Mundaǵy jumystar aldaǵy aptada bitýi kerek.

Aıta keteıik, atalǵan eki mekteptegi jumystardyń barysyn buǵan deıin qala ákimi Altaı Kólginov te tekserip qaıtqan bolatyn.