Nur-Sultandaǵy «Máńgilik el» saltanat qaqpasyna jóndeý júrgiziledi
NUR-SULTAN. QazAqparat - Elorda ákimdigi «Máńgilik el» saltanat qaqpasyna kúrdeli jóndeý jumystaryn júrgizýdi josparlap otyr, dep habarlaıdy QazAqparat tilshisi.
«Saltanat qaqpasyndaǵy jaǵdaı kóńil kónshitpeıdi. Jer asty arqyly ótpe joldyń týnneldik bóligin salý barysynda jumys sapasyz júrgizilgen. Jyl saıyn júrgiziletin jóndeý jumystary kemshilikterdi eńserýge múmkindik bermeıdi. Boljam boıynsha, kúrdeli jóndeý jumystaryna shamamen 600 mln teńge kerek», - dedi qala ákiminiń orynbasary Nurlan Nurkenov elordalyq máslıhattyń sessııasynda.
Óz kezeginde máslıhat depýtaty Sergeı Solodovnıkov qaqpa Qazaqstan Táýelsizdiginiń 20 jyldyǵyna oraı 2011 jyly ashylǵanyn atap ótti.
«Qalalyqtar men shahar qonaqtary saltanat qaqpasyna erekshe qyzyǵatyndyqtan, 2015-2016 jyldary joǵarǵy qabattaǵy mýzeıge jóndeý júrgizilgen bolatyn. Alaıda jer asty ótpe joldyń týnneldik bóliginiń qurylysy kezinde qurylys jumystary sapasyz júrgizilgen. Atap aıtqanda, nashar gıdroızolıatsııa, qaqpa aýmaǵynyń jol bóligine sapasyz janasýy, jol jabyndylary sharttarynyń saqtalmaýynyń salldarynan jer asty jolyna sý tolyp ketedi», - deıdi Sergeı Solodovnıkov.
Depýtat óz sózinde jyl saıyn júrgiziletin jóndeý jumystary atalǵan kemshilikterdi joıýǵa kómektespeı turǵanyn, al 2019 jylǵy kóktemdi jańbyr bul máseleni tipti ýshyqtyryp turǵanyn aıtyp ótti.
