Nur-Sultandaǵy qurylys nysanynda parkıngtegi oryndar páter retinde satylǵan
NUR-SULTAN. QazAqparat - Elorda ákimi Altaı Kólginov tańerteńgilik aralaý kezinde problemaly nysannyń biri «Qorǵaljyn kvartalynda» boldy, dep habarlaıdy Nur-Sultan ákimdiginiń baspasóz qyzmetine silteme jasap.
Bul úıdiń qurylysyna 292 úlesker qarajat salǵan. Mundaǵy páter sany turǵyn úı kesheni jobasynan artyq. Burynǵy qurylys salýshy turǵyn úıdiń joǵarǵy tehnıkalyq qabattary men jertólelerin páter retinde satyp jibergen.
«Bul aýmaqta eshqandaı qurylys jumystary júrip jatqan joq. Bizde eń tómengi qabatta parkıng bar. Biraq bul oryndardy páter retinde satyp jibergen. Ol jerden 13 adam páter satyp alǵan. Abattandyrý jumystary joq, ınjenerlik jeliler de joq. Qazandyq jabyq tur. Biz tipti onyń jumys isteıtin, ne istemeıtinin de bilmeımiz», - dedi turǵyn úıdiń úleskerleri.
Olardyń aıtýynsha, úleskerler ózderi kúzet jaldap, qaraýyl qoıǵan. Sebebi, úıdiń qurylys materıaldarynyń qoldy bolyp ketýinen qaýiptenedi. Osylaısha bul turǵyn úı kesheni 2017 jyly problemaly nysan bolyp tanylyp, salynǵan qarjy qaıtarymyn qamtamasyz etý úshin qosymsha jer ýchaskesin bólý qarastyrylǵan.
«Úleskerlerge úıleriniń qurylysynyń aıaqtalyp, óz páterlerine kirýi úshin memleket kómektesip jatyr. Joba-smetalyq qujatqa túzetý engizemiz, memlekettik saraptama jasaımyz. Oǵan qosa ınjenerlik jelileri boıynsha jobany alý kerek. Sodan keıin baryp abattandyrý jumystaryna kirisken jón. Jumys júrgiziletin bolady», - dep atap kórsetti qala ákimi Altaı Kólginov.
Qalada qurylysy aıaqtalmaǵan 51 obekti bar.
